Baruc 1 - Cebuano Meaning-Based Bible

Pasiuna

1Kining sa ikalimang tuig human iloga ug sunoga sa mga taga-Babilonia ang Jerusalem.

3-4Gibasa2 Hari 24:8-17. ug kusog ni Baruc ang basahon ngadto kang Joaquin nga anak ni Joakim nga hari sa Juda ug ngadto sa tanang mga tawo nga nagpuyo didto sa Babilonia sa tampi sa Suba sa Sud. Ang tanan miadto aron pagpamati sa pagbasa niini—ang mga hamili nga tawo, mga anak sa harianon nga mga banay, ang mga pangulo ug ang tanan gayong mga tawo sa bisan unsa nga kahimtang.

5Sa pagbasa sa basahon, ang tanan nanghilak, nagpuasa ug nag-ampo sa Ginoo.

6Unya ang tagsatagsa mihatag ug daghang salapi kutob sa iyang mahimo.

7Ang natigom nga salapi gipadala ngadto sa Jerusalem, ngadto kang Joakim nga Pangulong Pari nga anak ni Hilkias ug apo ni Sallum ug ngadto sa ubang mga pari ug sa tanang mga tawo nga uban kaniya didto sa Jerusalem.

8Sa ikanapulo nga adlaw sa bulan sa Siban, gikuha ni Baruc ang balaang mga kahimanan nga nadala gikan sa Templo ug giuli kini ngadto sa Juda. Kini mao ang mga kahimanan nga plata nga gipabuhat ni Sedekias nga anak ni Hari Uzias sa Juda

9human bihaga ni Hari Nabucodonosor nga taga-Babilonia si Joakim uban sa mga pangulo, sa mga panday, sa mga hamili ug sa ordinaryong mga tawo gikan sa Jerusalem ngadto sa Babilonia.

Usa ka Sulat ngadto sa Jerusalem

10Ang mga tawo misulat:

“Palihog gamita ang salapi nga among gipadala kaninyo aron ipalit ug mga mananap alang sa halad nga sunogon ug sa mga halad alang sa sala, aron pagpalit ug insenso ug aron adunay mga halad nga mga uhay. Ihalad kini didto sa altar sa Ginoo nga atong Dios

11ug pag-ampo kamo alang kang Hari Nabucodonosor sa Babilonia ug sa iyang anak nga si Belsazar aron mabuhi sila samtang anaa pa ang kalangitan.

12Unya ang Ginoo maglig-on kanamo ug mahimong among giya. Si Nabucodonosor ug ang iyang anak nga si Belsazar manalipod kanamo ug magmaunongon kami kanila samtang buhi pa kami; unya mahimuot sila kanamo.

13Naghangyo usab kami kaninyo nga mag-ampo kamo ngadto sa Ginoong Dios alang kanamo tungod kay nakasala kami batok kaniya ug nasuko gihapon siya kanamo.

14Palihog basaha kining basahona nga gipadala namo kaninyo ug paghimo kamo sa inyong kaugalingong pagkompisal sa sala didto sa Templo sa unang adlaw sa Kasaulogan sa mga Balongbalong ug sa ubang balaang mga adlaw sa tigom.

Usa ka Pagsugid sa Sala

15“Mao kini ang pagsugid nga kinahanglan inyong himoon: Ang Ginoo nga atong Dios matarong apan kita naulawan gihapon. Kitang tanang mga katawhan sa Juda ug sa Jerusalem,

16ang atong mga hari, mga pangulo, mga pari, mga propeta ug ang atong mga katigulangan naulawan

17tungod kay nakasala kita batok sa Ginoo nga atong Dios

18ug nagmasupilon kaniya. Wala kita mamati kaniya ug wala usab magkinabuhi subay sa iyang mga sugo.

19Sukad sa adlaw nga gipagula sa Ginoo ang atong mga katigulangan gikan sa Ehipto hangtod karong mga adlawa nagpadayon kita sa pagkamabudhion kaniya ug wala kita magpanuko sa pagsupak kaniya.

20Kaniadto,Deut. 28:15-68. sa diha nga gipagula sa Ginoo ang atong mga katigulangan gikan sa Ehipto aron mahatag niya kanato ang usa ka tabunok ug tambok nga yuta, mibungat siya ug mga tunglo batok kanato pinaagi sa iyang sulugoon nga si Moises. Ug karon nag-antos kita tungod niadtong mga tunglo.

21Nagdumili kita pagtuman sa pulong sa Ginoo nga atong Dios nga iyang gisulti kanato pinaagi sa mga propeta. Nagbuhat hinuon kitang tanan sumala sa atong gusto ug nagpadayon kita pagsubay sa atong kaugalingong daotan nga mga dalan. Midangop kita sa laing mga dios ug gihimo nato ang mga butang nga gikasilagan sa Ginoo.