Sirac 41 - Cebuano Meaning-Based Bible

Ang Kamatayon

1Kamatayon! Ang paghunahuna mahitungod niini mapait alang sa usa ka tawo nga hamugaway, nagpuyo nga malinawon uban sa iyang mga katigayonan, walay mga kagul-anan ug makahimo pa pagpahimulos sa iyang mga makaon.

2Kamatayon! Ang hukom niini gihulat sa usa ka tawo nga kabos, masakiton, tigulang na kaayo, nagbaguod sa mga kaguol, buta ug walay paglaom.

3Ayaw kahadlok sa Balaod sa kamatayon. Hinumdomi nga miabot kini kanila nga nahiuna kanimo ug moabot usab kini kanila nga mosunod kanimo.

4Ang Ginoo nagsugo niini alang sa tagsatagsa ka buhi nga binuhat. Kinsa man ikaw nga mosupak sa gimbut-an sa Labing Halangdon? Diha sa kalibotan sa mga patay walay magtagad kon nakaabot ba ug napulo o usa ka gatos o usa ka libo ka tuig ang imong kinabuhi.

Ang Dangatan sa mga Daotan

5Ang mga anak sa mga makasasala nga gimatuto ug gilibotan sa mga kaaway sa Dios nangahimo nga mga tawo nga talamayon.

6Mawad-an sila sa bisan unsa nga ilang napanunod ug ang ilang kaugalingong mga kaliwat magkinabuhi kanunay diha sa kaulawan.

7Ang mga anak mobasol sa ilang dili diosnon nga mga ginikanan tungod sa kaulawan nga ilang giantos.

8Alaot kamo, kamong mga tawo nga wala magtuo sa Dios ug mibiya sa Balaod sa Labing Halangdon nga Dios.

9Kon aduna kamoy mga anak, ang katalagman mohapak kanila ug walay mahibilin diha kaninyo gawas sa kaguol. Adunay dako nga kalipay inigkapukan ninyo ug bisan human sa inyong kamatayon kamo tunglohon.

10Ang gikan sa yuta, sa yuta usab mobalik. Mao usab ang mahitabo sa mga walay Dios: gihukman sila aron mangawagtang.

11Ang lawas sa usa ka tawo walay bili apan ang maayong dungog molungtad hangtod sa kahangtoran.

12Panalipdi ang maayo nimong dungog; taas pa kinig kinabuhi kay kanimo ug molungtad nga mas dugay kay sa daghang bulawan.

13Ang usa ka maayong kinabuhi may kinutoban apan ang usa ka maayong dungog molungtad hangtod sa kahangtoran.

Unsa ang Angay Kaulawan

14Mga kabataan, buhata ang akong itudlo kaninyo ug magkinabuhi nga malinawon. Ang kaalam nga dili ipadayag nahisama sa usa ka bahandi nga gitagoan—ang duha walay kapuslanan.

15Ang usa ka tawo nga nagtago sa iyang kabuang mas maayo pa kay sa usa nga nagtipig sa iyang kaalam.

16Mga kabataan ko, pamati ug tudloan ko kamo sa mga higayon kanus-a kamo angay nga maulaw. Usahay kini wala gayod mahimutang sa hustong lugar.

17Atubangan sa inyong mga ginikanan,

ikaulaw ang pagbuhat sa hilas nga mga butang.

Atubangan sa pangulo o sa importante nga tawo,

ikaulaw ang pagpamakak.

18Atubangan sa usa ka maghuhukom,

ikaulaw ang pagpakasala.

Atubangan sa usa ka tigom nga publiko,

ikaulaw ang pagsupak sa balaod.

Atubangan sa usa ka higala o kauban,

ikaulaw ang pagpanglimbong.

19Atubangan sa inyong mga silingan,

ikaulaw ang pagpangawat.

Ikaulaw ang dili pagtuman sa usa ka saad,

ang pagtukod sa imong siko diha sa lamisa nga kan-anan,

ang katihik kon pangayoan ka ug usa ka butang,

20ang dili pagbalos sa timbaya,

ang pagtutok sa usa ka babayeng daotan,

21ang pagbalibad sa usa ka hangyo sa usa ka paryenti,

ang paghikaw sa usa ka tawo sa mga butang nga makatarunganon nga iyaha,

ang pagtutok sa asawa sa laing tawo,

22ang pagpakighagwa sa ulipon nga babaye (pahilayo sa iyang higdaan!)

ang pag-insulto sa mga higala,

ang pagpakapin ug insulto sa gasa nga imong gihatag

23ug ang pagbutyag sa mga tinagoan.

Mao kini ang mga panahon nga angay kang maulaw ug ang mga tawo magtahod kanimo tungod niini.