1Sa pagkadungog sa mga silingang nasod nga gitukod pag-usab sa mga Judio ang altar ug gipahiuli ang Templo sumala sa kahimtang niini kaniadto, napungot sila pag-ayo
2ug nakahukom sila sa paglaglag sa tanan nga mga Judio nga nagpuyo taliwala nila. Busa misugod sila sa pagpamatay sa among katawhan.
3Ang mga taga-Edomea mibabag sa mga Israelita busa si Judas nakiggubat batok kanila didto sa Akrabatene. Gibuntog niya sila ug gipanakmitan sa ilang mga butang.
4Gigubat usab niya ang katawhan sa Baean nga maoy usa ka kanunayng hulga alang sa mga Israelita tungod kay mangatang silag mga magpapanaw nga Israelita.
5Gibabagan niya ang mga taga-Baean aron dili makagawas sa ilang mga kota. Nanumpa siya nga laglagon niya sila ug gisunog niya ang ilang mga kota lakip ang tanan nga didto niini.
6Unya gisulong niya ang yuta sa Amon diin gikasangka niya ang usa ka dako ug gamhanang pundok sa kasundalohan ubos sa pagmando sa usa ka tawo nga ginganlan ug Timoteo.
7Nagmadaugon si Judas sa daghang mga sangka batok kanila ug sa kataposan gibuntog niya sila.
8Nakuha niya ang Jazer ug ang naglibot nga mga kabalangayan niini ug unya mibalik siya ngadto sa Judea.
9Ang mga dili Judio didto sa Gilead nagpundok aron pag-ataki ug paglaglag sa mga Israelita nga nagpuyo niadtong mga yutaa apan ang mga Israelita nanagan ngadto sa kota sa Datema
10-11ug nagpadala niining mosunod nga sulat ngadto kang Judas ug sa iyang mga igsoong lalaki: “Ang mga dili Judio nga naglibot kanamo naghiusa sa ilang kasundalohan pinangulohan ni Timoteo. Nanagan kami nganhi niining kotaa aron kapanalipdan ug karon nangandam na sila sa pagkuha niini ug paglaglag kanamo.
12Daghan sa among mga kauban ang napatay. Dali kamo aron pagluwas kanamo!
13Ang tanang lalaki nga Judio niining yutaa sa Tob gipatay, ang ilang mga asawa ug mga kabataan gipamihag ug ang ilang mga kabtangan gipanala nila. May usa ka libo ka lalaki ang gipamatay didto.”
14Kining sulata gibasa pa sa diha nga miabot ang laing mga sinugo nga migisi sa ilang mga bisti tungod sa kasubo. Nagdala silag usa ka taho gikan sa Galilea
15ug miingon, “Usa ka pundok sa kasundalohan gikan sa Tolemais, sa Tiro, sa Sidon ug sa tibuok nga Galilea ang nagkahiusa sa paglaglag kanamo.”
16Sa pagkadungog ni Judas ug sa katawhan niining tanan, gihimo ang usa ka dakong tigom aron paghukom unsa ang angayng buhaton aron pagtabang niining mga isigka-Judio nga nahimutang sa kalisod tungod sa pag-ataki sa mga kaaway.
17Miingon si Judas ngadto sa iyang igsoon nga si Simon, “Pagpili ug pipila ka mga tawo ug lakat, luwasa ang atong kauban nga mga Judio didto sa Galilea. Ang atong igsoon nga si Jonatan ug ako mangadto sa Gilead.”
18Gibilin ni Judas ang ubang kasundalohan aron pagpanalipod sa Judea ug gibutang ang duha ka pangulo nga si Azarias ug si Jose nga anak ni Zacarias aron maoy mag-atiman sa katawhan.
19Gitugon sila niya, “Ibilin ko kamo aron magmando dinhi apan ayaw kamo pagpanggula ug pagpakiggubat sa mga dili Judio hangtod nga mahibalik kami.”
20Unya 3,000 ka lalaki ang napili ni Simon aron pag-adto sa Galilea ug 8,000 ang nagpabilin uban kang Judas aron sa pag-adto sa Gilead.
21Si Simon miadto sa Galilea ug nakigharong sa daghang mga sangka batok sa mga dili Judio. Gibuntog niya sila ug
22gipanggukod hangtod gayod sa siyudad sa Tolemais; gipatay nila ang mga 3,000 sa mga kaaway ug gisakmitan sa ilang kabtangan.
23Unya gikuha niya ang mga Judio nga didto sa Galilea ug Arbata uban sa ilang mga asawa, sa ilang mga anak ug sa tanan nga ilang gipanag-iya ug gidala sila pagbalik ngadto sa Judea uban kaniya. May dako nga kalipay niadtong tungora.
24Sulod niining panahona, si Judas Macabeo ug ang iyang igsoong lalaki nga si Jonatan nakatabok na sa Suba sa Jordan ug nakagula sulod sa tulo ka adlaw latas sa kamingawan.
25Nakasugat sila ug pipila ka mga mahigalaon nga taga-Nabatea nga nagsugilon kanila sa tanan nga nahitabo sa mga Judio didto sa Gilead.
26Mitaho sila nga daghang mga Judio ang gipriso didto sa kinutaan nga mga siyudad sa Bozra, sa Bosor, sa Alema, sa Caspo, sa Maked ug sa Carnaim
27samtang ang uban gipriso didto sa gagmay nga mga lungsod sa Gilead. Mitaho usab sila nga ang kaaway naglaraw nga sa sunod adlaw atakihon nila ang mga kota sa mga Judio aron paglaglag sa tanan nga mga Judio sa usa lamang ka adlaw.
28Busa si Judas ug ang iyang kasundalohan mibalik sa walay langan ug miataki sa Bozra sa dalan sa kamingawan. Giilog nila ang lungsod ug gipatay ang tanang tawo didto. Gipanakmit nila ang mga kabtangan sa lungsod ug gisunog kini.
29Mibiya sila didto sa pagkagabii ug miadto sa mga kota sa Datema.
30Sa pagkakaadlawon nakita ni Judas ug sa iyang mga tawo ang usa ka dakong pundok sa kasundalohan nga nag-ataki sa kota ug nagdalag mga hagdan, mga tungtonganan sa pag-ataki ug mga igdudumbol nga mga kahoy aron pag-ilog sa mga kota.
31Sa pagkadungog ni Judas sa kasaba, sa mga singgit ug sa tingog sa mga trumpeta nga naggikan sa siyudad, nakaamgo siya nga ang gubat misugod na
32busa miingon siya ngadto sa iyang mga tawo, “Pakiggubat kamo karong adlawa alang sa atong isigka-Judio.”
33Gimandoan niya ang iyang mga tawo sa paggula sa tulo ka laray ug sa pag-ataki sa kaaway gikan sa luyo. Sa ilang pag-asdang, gipatingog nila ang mga trumpeta ug naninggit sila sa ilang mga pag-ampo.
34Sa pagkakita sa mga kasundalohan nga ubos sa pagmando ni Timoteo nga si Judas Macabeo kadto, ang mga sundalo nanibog ug nanagan. Gibuntog sila ni Judas ug niadtong adlawa mga 8,000 ka tawo ang ilang napatay.
35Unya giataki ni Judas ang lungsod sa Alema ug nakuha niya kini ug gipatay ang tanan nga mga lalaki didto. Gisakmitan niya sa mga kabtangan ang lungsod ug gisunog kini.
36Gikan didto mipadayon siya ug giilog niya ang Caspo, ang Maked, ang Bosor ug ang uban nga mga lungsod sa Gilead.
37Human niini, gitigom ni Timoteo ang laing kasundalohan ug nagkampo siya atbang sa Rapon, sa tampi sa usa ka suba.
38Gipadad-an ni Judas ug pipila ka mga tawo aron pagpangespiya didto sa kampo ug mibalik sila pagtaho kaniya nga ang tanan nga dili Judio niadtong yutaa nakig-abin kang Timoteo ug naghimo sila ug usa ka dakong pundok sa kasundalohan.
39Si Timoteo nanglista usab ug sinuholang mga sundalo nga Arabo aron motabang kaniya ug kini sila nagkampo sa atbang nga tampi sa suba, andam sa pag-ataki kang Judas. Busa miadto si Judas aron pagsugat kanila alang sa gubat.
40Sa nagkaduol na sa suba si Judas ug ang iyang kasundalohan, si Timoteo miingon sa iyang mga opisyal, “Kon magpadayon siya pagduol ug pagtabok sa suba, dili kita makahimo sa pagsukol sa iyang ataki ug pildihon kita niya.
41Apan kon mahadlok siya ug mohunong sa pikas tampi sa suba, motabok kita aron pag-ataki ug pagbuntog kaniya.”
42Sa pag-abot ni Judas sa tampi sa suba, mimando siya sa iyang mga opisyal nga walay tugotan sa paghunong kondili magpadayon ang tanan ngadto sa unahan alang sa gubat.
43Si Judas mao ang una nga mitabok sa suba aron sa pagpakigbatok sa mga kaaway ug ang tanan niyang mga tawo misunod kaniya. Ang mga dili Judio nagkatibulaag; gipanglabay nila ang ilang mga hinagiban ug nanagan sila ngadto sa Templo nga pagano didto sa Carnaim.
44Apan giilog ni Judas ug sa iyang mga tawo ang siyudad ug gisunog ang templo lakip ang tanan nga didto niini. Sa pagkapukan na sa Carnaim, ang mga dili Judio wala na makasukol kang Judas.
45Unya gitigom ni Judas ang tanang mga Judio didto sa Gilead ug gidala sila pagbalik uban kaniya ngadto sa Judea. Usa kadto ka dakong pundok sa tanang matang sa katawhan uban sa ilang asawa ug kabataan ug sa tanan nilang kabtangan.
46Nanglakaw sila hangtod sa Epron, usa ka dako ug maayong pagkapanalipod nga lungsod. Dili kini mahimo nga libotan sa bisan diing kilid ug ang dalan naglatas gayod sa taliwala sa lungsod.
47Apan ang mga tawo didto wala motugot nga moagi sila ug gibabagan nila ang mga ganghaan sa lungsod ug mga bato.
48Unya gipadad-an sila ni Judas ug usa ka mahigalaon nga mensahe nga nag-ingon: “Tugoti kami pag-agi sa inyong yuta aron sa pagpauli ngadto sa amo. Walay usa nga magdagmal kaninyo kay igo lamang kami nga moagi.” Apan midumili gihapon sila pag-abli sa ilang mga ganghaan.
49Busa giingnan ni Judas ang tanan didto sa pundok, gawas sa mga manggugubat, sa pagkampo sa dapit diin sila mahimutang.
50Ang mga manggugubat nga mga lalaki gimandoan sa pagpahimutang sa ilang mga luna ug sa pag-ataki sa lungsod. Nakiggubat sila sa tibuok adlaw ug tibuok gabii hangtod nailog nila kini.
51Mimando si Judas nga ang tanang mga lalaki sa Epron patyon, nga sakmitan ang lungsod sa iyang mga kabtangan ug nga patagon kini. Unya siya ug ang iyang kasundalohan nanglakaw latas sa lungsod ibabaw sa mga lawas nga patay.
52Mitabok sila sa Jordan ngadto sa halapad nga patag atbang sa Betsan.
53Sulod sa tibuok nga panaw gialalayan ni Judas ang mga naulahi ug gidasig niya ang katawhan hangtod miabot sila sa yuta sa Judea.
54Uban sa pasalamat ug kasadya, nanungas sila ngadto sa Bukid sa Sion ug nagsakripisyo ug mga halad nga sinunog tungod kay nahibalik sila nga walay kabilinggan ug walay napildi bisan usa ka tawo.
55Samtang si Judas ug si Jonatan didto sa Gilead ug ang ilang igsoong lalaki nga si Simon nag-ataki sa Tolemais didto sa Galilea,
56si Jose ug si Azarias, ang mga pangulo sa kasundalohan nga didto sa Judea, nakadungog sa ilang maisog nga mga binuhatan ug kadaogan.
57Nag-ingnanay sila, “Makiggubat kita sa mga dili Judio nga naglibot kanato aron makaangkon kitag kabantog alang sa atong kaugalingon.”
58Busa sila ug ang ilang mga tawo miataki sa Jamnia.
59Si Gorgias ug ang iyang mga tawo nanggula sa lungsod aron pagsugat kanila diha sa gubat.
60Gipildi nila si Jose ug si Azarias ug gigukod sila hangtod sa utlanan sa Judea. Labing kubos 2,000 ka mga lalaki nga Israelita ang ilang napatay niadtong adlawa.
61Kining dakong kapildihan nahitabo tungod kay ang mga pangulo nga Judio buot man nga mahimong mga bayani ug nagdumili sa pagsugot kang Judas ug sa iyang mga igsoon.
62Gawas pa, dili sila sakop sa banay sa mga Macabeo nga gipili sa Dios aron paghatag ug kagawasan sa katawhan sa Israel.
63Apan si Judas Macabeo ug ang iyang igsoon nga mga lalaki gitahod pag-ayo sa tanang Israelita ug sa tanang dili Judio. Sa pagkadungog sa mga tawo sa ilang kabantog,
64dakong pundok sa katawhan ang nagtigom aron pagdayeg kanila.
65Unya si Judas ug ang iyang mga igsoon nakiggubat batok sa mga taga-Edom ngadto sa habagatan. Giataki niya ang Hebron ug ang naglibot nga mga lungsod, giguba niya ang mga kota niini ug gisunog niya ang mga tore nga naglibot niini.
66Unya migula siya ngadto sa yuta sa mga Filistihanon ug miagi latas sa Marisa.
67Niadtong adlawa pipila ka mga pari ang namatay sa gubat tungod kay buot sila nga mahimong bayani ug nagbinuang sa pag-adto aron pagpakig-away.
68Si Judas miliko ngadto sa Asdod sa Filistia. Giguba niya ang mga altar, gisunog ang mga larawan sa mga diosdios, gisakmitan niya sa kabtangan ang mga lungsod ug unya mibalik siya ngadto sa Judea.
Who We AreWhat We EelieveWhat We Do
2025 by iamachristian.org,Inc All rights reserved.
