Deuteronomio 29 - Tagalog Contemporary Bible（ASD）

Ang Pagbago ng Kasunduan

1Ito ang mga tuntunin ng pagsunod sa kasunduang ipinagawa ng Panginoon kay Moises sa mga Israelita sa Moab, maliban pa sa kasunduan na ginawa niya sa kanila sa Horeb.

2Ipinatawag ni Moises ang lahat ng Israelita at sinabi sa kanila:

Nakita ninyo ang lahat ng ginawa ng Panginoon sa Faraon at sa lahat ng opisyal niya at sa buong Ehipto.

3Nakita ninyo noon ang matinding pagsubok, ang mga himala at ang mga kamangha-manghang gawa.

4Ngunit hanggang ngayon, hindi pa kayo pinagkalooban ng Panginoon ng isip na nakakaunawa, o kayaʼy mga matang nakakakita at mga taingang nakakarinig.

5Sa loob ng apatnapung taon na pinangunahan ko kayo sa ilang, hindi naluma ang mga damit at sandalyas ninyo.

6Wala kayong pagkain doon o alak o ng iba pang inumin, ngunit binigyan kayo ng Panginoon ng mga kailangan ninyo para malaman ninyong siya ang Panginoon na inyong Diyos.

7Pagdating natin sa lugar na ito, nakipaglaban sa atin si Haring Sihon ng Hesbon at si Haring Og ng Bashan, ngunit tinalo natin sila.

8Inagaw natin ang lupain nila at ibinigay ito sa mga lahi nina Ruben, Gad at sa kalahating lahi ni Manases bilang mana nila.

9Kaya sundin ninyong mabuti ang mga ipinatutupad ng kasunduang ito, para maging matagumpay kayo sa lahat ng ginagawa ninyo.

10Sa araw na ito, nakatayo kayo sa harap ng harapan ng Panginoon na inyong Diyos: ang mga pinuno ng mga angkan ninyo, ang mga tagapamahala, ang mga opisyal at lahat ng kalalakihan ng Israel,

11ang mga asawaʼt mga anak ninyo, at ang mga dayuhan na naninirahang kasama ninyo na inyong tagasibak at taga-igib.

12Nakatayo kayo rito ngayon para gawin ang kasunduan sa Panginoon na inyong Diyos. Sinusumpaan ng Panginoon ang kasunduang ito ngayon.

13Gusto niyang mapatunayan sa inyo sa araw na ito na kayo ang mamamayan niya at siya ang Diyos ninyo ayon sa ipinangako niya sa inyo at sa inyong mga ninuno na sina Abraham, Isaac, at Jacob.

14Hindi lamang sa inyo ako nakikipagkasundo na may kalakip na sumpa.

15Ginagawa ko ang kasunduang ito hindi lamang sa inyo na nakatayo ngayon sa harapan ng Panginoon na ating Diyos, kundi pati na sa mga susunod pang salinlahi na hindi natin kasama ngayon.

16Nalalaman ninyo kung paano tayo nanirahan sa Ehipto noon at kung paano tayo naglakbay sa lupain ng iba pang mga bansa papunta sa lugar na ito.

17Nakita ninyo ang kanilang kasuklam-suklam na mga diyos-diyosan na ginawa mula sa kahoy, bato, pilak at ginto.

18Tiyakin ninyong wala ni isa sa inyo, babae o lalaki, sambahayan o angkan, na tatalikod sa Panginoon na ating Diyos at sasamba sa mga diyos ng mga bansang iyon para wala ni isa sa inyo ang maging katulad ng ugat na tumutubong mapait at nakakalason.

19Ang sinumang nakarinig ng mga babala ng sumpang ito ay huwag mag-iisip na hindi siya masasaktan kahit na magpatuloy siya sa kanyang gusto. Pagbagsak ang idudulot nito sa inyong lahat.

20Hindi siya patatawarin ng Panginoon. Maglalagablab ang galit ng Panginoon sa kanya tulad ng apoy, at mangyayari sa kanya ang lahat ng sumpa na nakasulat sa aklat na ito, at buburahin ng Panginoon ang kanyang pangalan sa mundo.

21Ibubukod siya ng Panginoon sa lahat ng lahi ng Israel, at pahihirapan siya ayon sa mga sumpa ng kasunduan na nakasulat dito sa Aklat ng Kautusan.

22Sa mga susunod na henerasyon, ang inyong mga lahi at ang mga dayuhang galing sa malayong lugar ay makakakita ng mga kalamidad at mga karamdamang ipapadala ng Panginoon sa inyo.

23Ang buong lupain ninyo ay magiging katulad ng disyerto na natabunan ng asupre at asin. Walang magtatanim sa lupaing ito dahil hindi tutubo ang mga pananim. Magiging katulad ito ng pagkawasak ng Sodoma at Gomora, Adma at Zeboim na ibinagsak ng Panginoon dahil sa matindi niyang galit.

24Pagkatapos, magtatanong ang mga bansa, “Bakit ginawa ito ng Panginoon sa kanyang bansa? Bakit napakatindi ng kanyang galit?”

25At sasagutin sila nang ganito, “Dahil sinuway ng mga taong ito ang kasunduang ginawa sa kanila ng Panginoon, ang Diyos ng kanilang mga ninuno, nang inilabas niya sila sa Ehipto.

26Sumamba sila at naglingkod sa ibang mga diyos na hindi nila nakikilala, na ipinagbawal ng Panginoon na sambahin nila.

27Kaya nagalit nang matindi ang Panginoon sa kanilang bansa at ipinalasap niya sa kanila ang lahat ng sumpa na nakasulat sa aklat na ito.

28Sa matinding galit ng Panginoon, pinalayas niya sila sa kanilang bansa at ipinabihag sa ibang mga bansa kung saan sila naninirahan ngayon.”

29May mga lihim na bagay na ang Panginoon lang ang nakakaalam, subalit ipinahayag niya sa atin ang kanyang kautusan, at dapat natin itong sundin maging ng ating lahi magpakailanman.