KUTOLLO 10 - Northern Sotho 1951/1986（NSO51）

Johane o ja lengwalo

1Ka bona morongwa e mogolo yo maatla a fologa legodimong a apere leru, hlogong ya gagwe go le molalatladi, sefahlogo sa gagwe se le bjalo ka letšatši, maoto a gagwe a le bjalo ka kokwane tša mollo.

2Seatleng sa gagwe o be a swere lengwalonyana le le phutholotšwego. Ka leoto la gagwe la le letona a gata lewatle, ka le letshadi a gata lefase.

3A hlaboša lentšu le legolo wa tau ge e lla; ge a le hlaboša, medumo e šupilego ya kwatša mantšu a yona.

4Ge medumo yeo e šupago e kwaditše mantšu a yona, nna ka re ke a ngwala. Ka kwa lentšu le le tšwago legodimong le bolela le nna le re: Phuthela o ute tše di boletšwego ke medumo yeo e šupago; o se ke wa di ngwala.

5Bjale morongwa eo ke mmonego a gatile lewatle le lefase, a ntšha letsogo a le emišetša kua legodimong,

6A ena ka yena wa go phela go iša mehleng ya neng le neng, e a hlodilego legodimo le tše di lego mo go lona, le lefase le tše di lego mo go lona, a ena a re: Lebaka le ka se hlwe le eba gona!

7Se se tlogo ba gona mehleng ya ge go kwala lentšu la morongwa wa go šupa ge a tlo letša phalafala, ke go phethega ga thopa ya Modimo ye a e boditšego baporofeta bahlanka ba gagwe.

8Lentšu leo ke le kwelego le etšwa legodimong la bolela le nna la re: Yaa o tšee lengwalonyana le le phutholotšwego le lego seatleng sa morongwa eo a gatilego lewatle le lefase.

9Nna ka ya go morongwa eo, ka re: Mphe lengwalonyana leo! Yena a re: Tšea o le metše; le tlo go babiša mala; fela, ka ganong le tlo go tsefela wa dinose.

10Ka tšea lengwalonyana leo seatleng sa morongwa, ka le metša; mo ganong la ntsefela wa dinose; ka re go le metša la mpabiša mala.

11Ka kwa ke botšwa go thwe: Sa gago e tlo ba go buša go porofetela merafo le ditšhaba le maleme le dikgoši tše ntši.