DIPSALME 7 - Northern Sotho 1951/1986（NSO51）

Morena Moahlodi wa go lokaSefela sa Dafida, se a se opeletšego Morena ka taba ya Kushe wa Benyamini.

1Morena Modimo wa ka! Ke holofetše wena; ako ntlhakodiše diatleng tša bohle ba ba ntlhomarago, o mphološe.

2Ba sa tlo nkgarola boka tau; ba sa tlo nkgagola go se na monamoledi.

3Morena Modimo wa ka! Ge nka be ke dirile tše: Ge diatla tša ka nka be di na le bokgopo,

4Ge nka be kerumotše wa go agišana le nna, -- anthe ke bile ke efetše montlhoelalefela, --

5Gona lenaba la ka a le ntlhomarele mme le ntshware, le gatakele phelo bja ka fase, le lahlele ina la ka leroleng.

6Morena, tsoga ka bogale, šiteletša hlogo sa bampateletši; mphakgamele ka kahlolo ye o e lailego.

7Botha ditšhaba di go bokanele, o boe o dule o di okametše.

8Morena wena Tshekišaditšhaba, le nna nkahlolele, Morena, ke dirwe se se lebanego le go loka ga ka, ke se ne bosodi.

9Bobe bja ba babe bo fediše; wa go loka mo tiiše; O Modimo wa go se hlaole, wena Mofetlekapelo-le-matswalo.

10Nna, Modimo o ntshwaretše kotse, yena Molwedi wa ba pelotsoro.

11Modimo, Moahlodi wa go se hlaole, Modimo o hlwa a di galefetše.

12Ge motho a sa boe, o kgarimanya tšhoša yagwe, o ngangile bora a bo bea.

13O mmeetše le dibetšadibolai; mesebe yagwe o e dira ya go fiša.

14Bonang gee! Moemaraboleu, modušabokgopo, o tswala maaka.

15Moepamoreo o fatile, a wela moleteng wa gagwe.

16Boleu bja gagwe bo tlo mmoela hlogong; lehloyo la gagwe le tlo mo wela phogo.

17Ge e le nna, ke tlo leboga Morena ka gobane ga a hlaole; ke tlo opelela ina la Morena Yogodimodimo.