1Gwa fetola Tsofara wa Naama, a re:
2A mantšu a makaakaa a ka leswa a se ne phetolo? A monna wa moratharathi a ka fo thwe: Ee, o rerešitše?
3A taba tšago tša metlae di ka fo homolelwa, wa tlo šala o nyatša o hlokile moganetši.
4Wena o re: Thuto ya ka ke tshekegi; o a mpona, ke yo bolo.
5Joo, Modimo a ka be a bue; a ka be a ahlame a bolele nago!
6A ka be a go utollele diba bja bohlale bjagwe bo fetago tsebo ka bogolo le ka bontši; gona o ka be o lemoga ge Modimo a se bele melato ya gago yohle.
7A thopa tša Modimo o ka di fihlela? A botlalo bja Yomaatlaohle o ka bo hlaologanya?
8Ke bja kua godimodimo. O ka dirang? Go ya tlase bo feta kua bodulabahu. O sa tsebang?
9Botelele, bo feta kua go gomago mafase; bophara bo feta lewatle.
10Ge yena a ka rotoga, a go swara, a go iša letlatsweng, ke mang a ka mo thibelago?
11Gobane batho ba lefela o ba lemogile; bobe o bo bona, le ge a sa eleletše.
12Moo le motho wa sesoswana a ka eletšega; le namane ya pokolo e ka fetoga motho.
13Wena bjale baakanya tša pelong ya gago; iša diatla tša gago go yena.
14Ge atla tšago di na le bobe, bo lahle, o se agiše bosenyi mo motseng wa gago.
15Ke mo o tlogo fahloga o se ne bosodi, wa kwa maatla, o se šie selo.
16O tlo lebala mahlomola; ge o a gopola, a tlo etša noka ge e pšhile.
17O tlo selwa ke bophelo boka etša sa mosegare; le ge go le leswiswi, go tlo etsa matlagosa.
18O tlo bea pelo, gobane go sa holofetša. Le ge o talatatša mahlo, o tlo iketla wa robala.
19O tlo lala go se yo o mmoifago; go tla ata ba ba boifago mahlo ago.
20Mahlo a ba babe ona a tlo nyama, setšhabelo se ba senyegetše; se se ba šaletšego e le go fela moya fela.
Who We AreWhat We EelieveWhat We Do
2025 by iamachristian.org,Inc All rights reserved.
