JESAYA 59 - Northern Sotho 1951/1986（NSO51）

Basenyi ba hloka khutšo. Basokologi ba tlo tlelwa ke Molopolodi

1Tseba gobane letsogo la Morena ga se le le kopana, le le kago šitwa go phološa; tsebe tša gagwe ga di a thibala tša šitwa go kwa.

2Le arogana le Modimo wa lena ka masenyi a lena; se se širago sefahlego sagwe ke dibe tša lena, a se le kwe.

3Gobane diatla tša lena di thankgetše madi; menwana ya lena e gomaretšwe ke bokgopo; melomo ya lena e bolela maaka; mme maleme a lena a bolabola tše sa hlamegago.

4Ga go moseka ka toko, ga go moahlolelo wo o botegago; ba botile kgobelano, ba bolela maaka, ba amere ditapišo, mme ba tswala bokgopo.

5Ba alamela mae a marabe ba phaphaša, ba rea ka bolepu bja segokgo. E a jago mae a bona o tlo hwa; gomme ge motho a a pšhatla, go tšwa marabe.

6Tše ba di logago ga di aparwe; tše ba di dirago ba ka se ikapeše tšona; ditiro tša bona ke ditiro tše kgopo, mme diatla tša bona di dira tše šoro.

7Maoto a bona a nakogela bobe, ba kganyela go tšholla madi a se nago molato; maano a bona ke maano a mabe; mohlala wa bona ke tshenyo le mašegerepe.

8Tsela ya molao ga ba e tsebe, mosepelelo wa bona ga o na go loka, ba swara tsela tša manyokenyoke; e a kago wela tšona, ga a tsebe khutšo.

9Ke ka baka leo re le kgole le moahlolelo wa go loka; toko ga e re fihlele. Seedi re se hlologetšwe, mme šele leswiswi. Re lebeletše meso, mme re sa sepela e le bošego.

10Re apaapa le leboto bjalo ka sefofu, e ke ga re ne mahlo, re apaapa; re kgopiwa e le mosegare, e ke ke bošego; re maswiswing bjalo ka ba ba hwilego.

11Bohle re lla bjalo ka diphiri, re lla bjalo ka maeba; re letetše toko, mme ga e bonale; re letetše go phološwa, mme go kgole le rena.

12Gobane pele ga gago dikarogo tša rena ke tše dintši; mme dibe tša rena di a re bega. Gobane karogo tša rena di mo go rena; melato ya rena re a e tseba.

13Ke go hlanoga, le go aketša Morena, le go goma le go gana go latela Modimo wa rena, ke go rera pateletšo le karogo, ke go theeletša mantšu a maaka le go a bolela.

14Moahlolelo wa go loka wa bušetšwa nthago, toko ya re ema kgole, therešo ka gobane e kgopilwe mo kgorong, bokwala bo šitwa go tsena,

15Potego ya hlokega, gwa hlakolwa moilabobe.

Gomme Morena o di bone tša mmefela, go se mokgwa o bolo.

16A bona go se na monna, a belaela ge go se monamoledi; a kgonišwa ke letsogo lagwe, a thekgwa ke toko ya gagwe.

17A itlhama ka diphemo tša toko, a rwala kefa ya phološo, a apara kobo ya tefetšo; seaparo sagwe ke kgalefo.

18O tlo lefetša ka go lata tiro; o tlo galefela ba ba mo hloyago; manaba a gagwe o tlo a lefetša; mme dihlakehlake o tlo di fa moputso wa tšona.

19Ke mo ba kua bodikela ba tlogo šia ina la Morena, le ba bohlabela ba šia borena bja gagwe; le ge lenaba le ka fihla wa mafula a meetse, Moya wa Morena o tlo le tsemela sefoka.

20Tsione go tlo tlelwa ke Molopolodi wa ba ga Jakobo ba boago karogong. O realo Morena.

21Morena o re: Ge e le nna, molaka wa ka šo: Moya wa ka o lego go wena, le mantšu a ka a ke a beilego molomong wa gago, a ka se tloge molomong wa gago, le melomong ya bana bago, le ya bana ba bana ba gago, bjale le neng le neng. O realo Morena.