1Simisone o kile a fologela Thimina, a bona mosadi e mongwe la banenyana ba Bafilisita ba gona moo Thimina.
2A boa a botša tatagwe le mmagwe a re: Kua Thimina ke bone mosadi; ke ngwanenyana wa Bafilisita; ntšeišeng yena e be mosadi wa ka.
3Tatagwe le mmagwe ba re: Mo go barwedi ba bana baborena le mo setšhabeng sa gešo ka moka, a ga go na mosadi, ge o yo tšea mosadi go Bafilisita ba ba sa bollago?
Simisone a botša tatagwe a re: Ntšeiše yena eo; ke yena a kgahlago mahlo aka.
4Tatagwe le mmagwe ba be ba sa tsebe ge taba ye e etšwa go Morena, e le ya go mo lohlanya le Bafilisita; ka gobane mehleng yeo Baisiraele ba be ba bušwa ke Bafilisita.
5Gomme Simisone a fologela Thimina a na le tatagwe le mmagwe. Ya re ge a tla dirapeng tša merara tša Thimina, a gahlana le tau ya lesogana e rora e le tseleng.
6A tlelwa ke moya wa Morena, a napa a e gagoganya e ke ke putšanyana, a sa swara selo diatleng tša gagwe. Gomme tatagwe le mmagwe a se ke a ba botša se a se dirilego.
7Ge a fihlile Thimina a kwana le mosadi yola a bego a mo kgahla.
8Gwa feta matšatši; Simisone a boela go mmeka; a fapogela go bona setoto sa tau yela; a hwetša mo marapong a yona go na le motšhitšhi wa dinose le mamapo.
9A a rafa, a feta, a tšama a eja; a fihla go tatagwe le mmagwe, a ba nea ba ja; mme a se ke a ba botša ge mamapo ao a a rafile marapong a tau.
10Ya re ge tatagwe a fihlile mo go bego go le mosadi yo, Simisone a dira monyanya wa lenyalo gona moo; ka gobane masogana a be a dira ka mokgwa woo.
11Ge ba mmona, ba hlaola masogana a masome a mararo a go dula le yena.
12Bona bao Simisone a ba rera a re: A nke ke le hlabele nyepo. Ge le ka e nyepolla mehleng yeno e šupago ya monyanya, ke tlo le nea mašela a masome a mararo, le masome a mararo a dikobo tša monyanya.
13Fela, ge nyepo ya ka e ka le palela, ke mo lena le tlo go nnea mašela a masome a mararo le dikobo tše masome a mararo.
Bona ba re: Hlaba nyepo ya gago.
14Ke mo a itšego: Thai! Sejo se tšwa go sejato! Bose bo tšwa go yo maatla! Gwa fela matšatši a mararo ba sa paletšwe go nyapolla.
15Ka tšatši la bone ba bolela le mosadi wa Simisone ba re: Otelela monna wa gago, a re hlathollele nyepo yeo. Ge o sa re nyapollele, gona wena le lapa la tatago re tlo le tšhuma ka mollo. Afa le re laleditše gore le hume ka rena?
16Mosadi wa Simisone a mo llela a re: O ntlhoile; ga o nthate; gobane o hlabetše ba gešo nyepo, wa lesa go ntlhathollela.
Simisone a re: O tsebe gore le tate le mme ga kešo ka ba botša, a o re ke tlo botša wena?
17Mosadi wa gagwe a mo llela gwa ba gwa fela matšatši a monyanya; ka la go šupa, a šetše a tenegile, a mmotša tlhathollo; mosadi a yo botša ba ga boyena.
18Ka lona leo la go šupa, letšatši le sešo la dikela, banna ba motse ba tla ba mo rera ba re: Se se phalago nose ka bose ke eng? Se se phalago tau ka maatla ke eng? Yena a fetola a re: Ge le ka be le sa ka la lema ka namane ya ka, le ka be le sa ka la ya ka nyepo ya ka.
19A tlelwa ke moya wa Morena, a fologela Asikaloni, a bolaya banna ba masome a mararo ba gabobona; a tšea diaparo tša bona, a di nea banna bala ba go nyarola nyepo ya gagwe. A boela gae a befetšwe.
20Mosadi wa Simisone a tšewa ke yo mongwe, ke lekgetle la gagwe la mohla wola wa monyanya.
Who We AreWhat We EelieveWhat We Do
2025 by iamachristian.org,Inc All rights reserved.
