JESAYA 4 - Northern Sotho 1951/1986（NSO51）

Phološo ye e tlogo tla ka Mesia

1Mehleng yeo basadi ba ba šupago ba tlo gomarela monna o tee ba re: Bogobe re tlo ja bja rena; le diaparo re tlo apara tša rena; fela, a re bitšwe ka ina la gago, o fediše go nyatšega ga rena.

2Mohlang woo lehlogedi la Morena le tlo taga la tumišwa; mme kenyo tša naga e tlo ba bothakga le botšhepi bja baphološwa ba Isiraeli.

3Ba ba šaletšego mo Tsione, le mašalela a mo Jerusalema, ba tlo bitšwa ba bakgethwa; e tlo ba bohle ba ba ngwadilwego le baphedi fa Jerusalema.

4Ke tša mohla wo Morena a tlogo ba a hlatswitše tšhila tšohle tša barwedi ba Tsione, a swietše melato ya madi ya Jerusalema, ya tšwa ka moya wa kahlolo le ka moya wa go tšhuma.

5Mme godimo ga thaba ya Tsione mo go fela, le godimo ga diphuthego, Morena o tlo bea leru la muši mosegare, le seetša sa mollo o tukago bošego; e tlo ba yona tšhireletšo ya bokwala bjohle.

6Go tlo ba le leobo la moriti mosegare ge go fiša, la go tšhabela gona le go khuta ditimo le dipula.