1Haleluya! Retang leina la Morena! Retang, lena bahlanka ba Morena.
2Lena le emego mo Ngwakong wa Morena, le mo malapeng a Ngwako wa Modimo wa rena.
3Retang Morena gobane ke yo bolo; hlabang sefela sa ina la gagwe, gobane le a ratega.
4Gobane Morena o itlhaoletše Jakobo le Isiraele, ya ba leru la gagwe.
5Ka kgonthe, nna ke tseba gobane Morena ke yena e mogolo; Mong wa rena o feta medimo ka moka.
6Tše a ratago go di dira o di dira tšohle kua magodimong le mo lefaseng, le kua mawatleng, le gohle madibeng.
7O rotoša maru kua pheletšong tša lefase; o tšweletša dikgadima tša ge pula e ena, o ntšha diphefo mo a di bolokago.
8Maitšibulo a kua Egipita, a batho le a dikgomo, o a bolaile.
9Ke mola a roma mehlolo le dimakatšo, mme tša go tsena, wena Egipita, le Farao le malata a gagwe ka moka.
10A otla ditšhaba tše ntši, magoši a maatla a a bolaya.
11Sihoni kgoši ya Amoro, le Ogo kgoši ya Basani, le yohle mebušo ya Bakanana.
12Naga ya bona a e nea Isiraele, ya ba ya bona, magae a setšhaba sa gagwe.
13Morena, leina la gago ke la neng le neng. O tlo tsebja ke meloko le melokoloko.
14Gobane Morena o tlo ahlolela setšhaba sa gagwe, o kwela balata bagagwe bohloko.
15Medimo ya ditšhaba ke ya silifera le gauta, dibopša tša diatla tša batho.
16E na le melomo mme ga e bolele; e na le mahlo, mme ga e bone;
17E na le ditsebe, gomme ga e kwe; gomme ga e buše moya ka ganong ga yona.
18Babopi ba yona ba swana le yona, le bohle ba ba e botago.
19Lena ba leloko la Isiraele, retang Morena! Lena ba leloko la Arone, retang Morena!
20Lena ba leloko la Lefi, retang Morena! Lena ba go boifa Morena, retang Morena!
21Morena a a retwe motseng wa Tsione, yena Moagi wa Jerusalema. Haleluya!
Who We AreWhat We EelieveWhat We Do
2025 by iamachristian.org,Inc All rights reserved.
