LEFITIKO 4 - Northern Sotho 1951/1986（NSO51）

1Morena o boletše le Moshe a re:

2Botša Baisiraele o re: Ge motho a sentše, a sa dira ka boomo, a dira se se ileditšwego ke Morena, a sela o mongwe wa melao,

3ge go sentše moperisitamotlotšwa, a obela setšhaba molato, yena a tlišetše Morena powana ya leselela e se nago bosodi; a e tliše ka baka la sebe se a se dirilego, e be seloba.

4A e tliše mojako wa Ngwako wa Kgwerano pele ga Morena, a e bee seatla hlogong, a tsebo e hlaba pele ga Morena.

5Yena moperisitamotlotšwa a ge madi a yona, a a tliše mo Ngwakong wa Kgwerano.

6A ine monwana wa gagwe mo mading ao, a fokele pele ga Morena; a dire gašupa a lebane le lešira la sekgethwa.

7Ka madi a fetše dinaka tša aletare ya diorelo tša monko o bose, e lego pele ga Morena mo Ngwakong wa Kgwerano; mme ka moka ga ona a a tšhollele fase ga aletare ya dihlabelo e lego mojako wa ngwako wa Kgwerano.

8Makhura ka moka a powana yeo ya seloba a a ntšhe mo go yona, e lego lebipi, le makhura ka moka a mala,

9le dipshio ka dipedi le makhura a tšona le a moseko, le sebetšana, -- a di tloše go a dipshio,

10go dirwe ka mokgwa wa powana ya sedimo sa seleboga, mme moperisita a di tšhume mo aletareng ya dihlabelo.

11Ge e le letlalo la powana, le dinama tša yona ka moka, le hlogo ya yona, le mehlahu ya yona, le mala a yona, le mošwang wa yona,

12powana ka moka a e ntšhetše ntle ga mešaša felo mo go sego ditšhila sethobolong sa molora, mme a e fiše ka mollo godimo ga dikgong. E fišwe gona moo sethobolong sa molora.

13Ge go sentše phuthego ka moka ya Isiraele, e sa ka ya dira ka boomo, phuthego e se tsebe molato woo, mme ba dirile se se ileditšwego ke Morena, se se sa dirwego, ba oba molato,

14mohla go tsebagala sebe se ba se dirilego, phuthego e tliše powana ya leselela e be seloba; ba e tliše pele ga Ngwako wa Kgwerano.

15Gomme bagolo ba phuthego ba bee diatla hlogong ya powana yeo ba le pele ga Morena, me e hlabje pele ga Morena.

16Mme moperisitamotlotšwa a ge madi a powana yeo, a a tliše Ngwakong wa Kgwerano.

17A ine monwana wa gagwe mo mading ao, a fokele pele ga Morena ga šupa a lebane le lešira.

18A fetše dinaka tša aletare e lego pele ga Ngwako wa Kgwerano ka madi ao; mme a a šalago a a tšhollele fase aletareng ya dihlabelo mojako wa Ngwako wa Kgwerano.

19Makhura ka moka a a tšee a a tšhume aletareng.

20Powana ye a e dire ka mokgwa wa powana ya seloba, ka mokgwa woo. Ke mo moperisita a tlogo dira poelanyo, mme ba lebalelwa.

21Powana ka moka a e ntšhetše ka ntle ga mešaša, a e tšhume ka mokgwa wa yela ya pele. Ke sona seloba sa phuthego.

22Ge go sentše wa kgošana, a dirile se se ileditšwego ke Morena Modimo wa gagwe, a sa dira ka boomo, a dirile se se sa dirwego, a oba molato,

23ge a ka botšwa sebe sa gagwe se a sentšego ka sona, gona a tliše phokwana e se nago bosodi, e be sebego sa gagwe.

24A bee seatla sa gagwe hlogong ya phokwana, yeo, a e hlabe gona moo go hlabjago dihlabelo pele ga Morena. Ke seloba.

25Moperisita a tsebo kgwatha madi a seloba seo a fetša dinaka tša aletare ya dihlabelo ka ona; madi a šetšego a a tšhollele fase aletareng ya dihlabelo.

26Makhura ka moka a a tšhume ka mokgwa wa sedimo sa seleboga. Ke mo moperisita a tlo go mo direla poelanyo ka baka la sebe sa gagwe, mme a lebalelwa.

27Ge go sentše motho fela, a dira se se ileditšwego ke Morena, a sa dira ka boomo, a dirile se se sa dirwego, a oba molato,

28ge a botšwa sebe sa gagwe se a se dirilego, a a tliše putšane ya tshadi e se nago bosodi, e be sebego sa gagwe ka baka la sebe sa gagwe se a se dirilego;

29a bee seatla sa gagwe mo hlogong ya seloba sa gagwe, mme a se hlabe mo go hlabjago dihlabelo.

30Moperisita a kgwathe madi a yona ka monwana wa gagwe, a fetše dinaka tša aletare ya dihlabelo ka ona; madi a yona a a šetšego ka moka a a tšhollele fase aletareng.

31Makhura a yona ka moka moperisita a a tšee ka mokgwa wo a tšerego makhura a sedimo sa tebogo ka wona, a a tšhume aletareng, e be monko o bose wa Morena. Ke mo moperisita a tlogo mo direla poelanyo, mme a lebalelwa.

32Ge a ka re ke tliša nku ya sebego sa seloba, gona a tliše ya tshadi ye e se nago bosodi.

33A bee seatla mo hlogong ya seloba sa gagwe, mme a e hlabe mo go hlabjago dihlabelo.

34Moperisita a kgwathe madi a seloba seo ka monwana wa gagwe, mme a fetše dinaka tša aletare ya dihlabelo ka ona; madi a yona a a šetšego ka moka a a tšhollele fase aletareng.

35Makhura a yona ka moka a a nthše ka mokgwa wa a nku ya sedimo sa seleboga, mme a a tšhume mo aletareng, mo mellong ya Morena. Ke mo moperisita a tlogo mo direla poelanyo ka baka la sebe sa gagwe se a se dirilego, mme a lebalelwa.