DIEMA 4 - Northern Sotho 1951/1986（NSO51）

Theetša tayo ya tatago o nyake bohlale

1Hee banaka! Kwang tayo ya rraweno! Theetšang, le ithute tlhaloganyo.

2Ke le ruta thutobolo; se nyatšeng molao wa ka.

3Ke be ke le morwa wa tate, ke le ngwanangwako wa mme.

4Ka rutwa ke thwe: Pelo yago a e sware mantšu a ka; hlokomela ditaelo, ke mo o tlo go phela.

5Rua bohlale; rua tlhaloganyo; o se lebale puo ya molomo wa ka wa e lahla.

6Se di tlogele; di go lotole. Di rate, di go diše.

7Mathomo a bohlale ke go re: Rua bohlale! Ntšha tšohle o di ruilego, o reke tlhaloganyo.

8E phagamiše, e go godiše. E tla go retiša, ge o ka e gokarela.

9E tlo go rweša mphapahlogo o botse: e tlo go tlemelela ala sa botšhephi.

10Ngwanaka! Theetša, o amogele mantšu a ka; o tle o atelwe ke mengwaga ya go phela.

11Ke go ruta tsela ya bohlale; ke go gatiša mehlaleng e lokilego.

12Go ka swara ka yona, nao tšago ga di tanywe; go kitima, o ka se ke wa kgopja.

13Gomarela thuto! Se e lahle! E boloke. Ke yona bophelo bja gago.

14O se ke wa wela mmila wa bakgopo; o se gate tsela ya ba babe.

15Šikologa! Se e batamele; e fularele mme o iphetele.

16Gobane bao, ga ba robale ba sešo ba dira bobe; boroko mo go bona ga bo sware ba sešo ba uša motho.

17Gobane ba phela ka bogobe bja bokgopo; ba nwa morara wa tlhakolo.

18Ge e le mmila wa baloki o etša boka mahuba ge a hlatloga, tšatši la ba la hlaba.

19Tsela ya bakgopo e bjalo ka lefsifsi; ga ba tsebe se se tlo go ba kgopa.

20Ngwanaka! Theetša mantšu aka, o sekegele dipolelo tša ka tsebe.

21A di se ke tša go širogela; di boloke mo pelong ya gago.

22Gobane di phediša ba ba di hwetšago; di ba fodiša mmele wohle.

23Mo go tšohle di dišwago, diša pelo yago; gobane bophelo bo hlaga go yona.

24Bofora bja molomo, kgaogana nabjo; maaka a molomo a be kgole nago.

25A mahlo a gago e be a tebathwii; dintšhi tša gago di nepe se o lebanego naso.

26Lekanya bogato bja nao tša gago, ditsela tša gago ka moka di loke.

27Se fapogele ka go le letona, le ge e le go la ntsogošo, o efoše oto lago bobe.