1Ge e le silifera e ne mo e tšwago; le gauta e ne felo mo e hlatswiwago.
2Tshipi e ntšhwa fase; mme mphiri o tologa o le leswikeng.
3Motho o raka leswiswi, a yo fenyeka tša kua fasefase, maswika a swiswing la thiti ya lehu.
4Ba epa moepo, ba tloga mo go agilego batho; ba lebalwa mo go la mešito; ba ilo lekelela kua go sego batho.
5Lefase le le medišago dijo, kua teng ga lona le fetoga mme la etša mollo.
6Matlapa a lona ke lona legae la talama; le gauta e tšwa gona moo.
7Tsela ya gona ga e tsebje ke lenong; le leihlo la leaka ga lešo la e bona.
8Le dibata tša lešoka ga di sware tsela yeo; le tau ga e gate moo.
9Motho yena o iša seatla mantsweng o phekgola medu ya dithaba.
10O thula mefoma mantsweng, leihlo la gagwe la bona matsaka a mehutahuta.
11O thiba didiba tša lesa go dutla; gomme tše di utilwego o di tšweleletša seeding.
12Ge e le bohlale bjona bo ka bonwa kae? Tlhaologanyo e agile kae?
13Motho tlhago ya bohlale ga e tsebe; ga bo hwetšwe mo faseng la ba phelago.
14Bodiba bo re: Mo go nna ga bo yo! Lewatle le re: Ga ke nabjo!
15Ga bo rekwe ka gauta ya paala; ga bo lekanyetšwe silifera.
16Le gauta ya Ofira e ka se bo lekane, le ge e ka ba pheta le talama.
17Ga bo rekwe ka gauta le ka thuka; ga bo rekanywe ka dibjana tša gauta.
18Pheta ya thaga le ditaemane ga di bapetšwe le bjona; theko ya bohlale e feta pheta ya lewatle.
19Le lebje la Kushe le ka se bo fihlele; ga bo elwe ka gauta ya bohlokwahlokwa.
20Bjale, bo tšwa kae bohlale? Tlhaloganyo e agile kae?
21Bo utetšwe bohle ba phelago; bo fihletšwe le dinong tša kua godimo.
22Sekoti le lehu di re: Ditsebe tša rena di kwile tumo ya bjona.
23Mohlathatsela-ya-bohlale ke Modimo; ke yena a tsebago mo bo agilego gona.
24Yena o bona le magomo a lefase; o šetša tšohle tša ka tlase ga leratadima.
25Mola a lekanyetša phefo maatla, a abaganya meetse a lekana gohle,
26mola a bea melao ya pula, a beela tladi ya modumo tsela,
27ke mo a bo bonego, a bo bala a bopa, a bo beakanya;
28a botša motho a re: Go boifa Mong a bohle ke bjona bohlale; go tlogela bobe ke tlhaologanyo.
Who We AreWhat We EelieveWhat We Do
2025 by iamachristian.org,Inc All rights reserved.
