DIPSALME 18 - Northern Sotho 1951/1986（NSO51）

Morena MonamodiYa mohlabeledi, sefela sa Dafida mohlanka wa Morena; o hlabetše Morena mantšu a sefela se mohla wola wa ge Morena a mo namoletše matsogong a manaba a gagwe ka moka, le matsogong a Saulo, a re:

1Ke go ratile, Morena, wena maatla a ka.

2Morena, o lentswe la ka, le sebo sa ka, o monamoledi wa ka. O Modimo wa ka, o thaba ya ka ye ke e botilego, o kotse ya ka, o lenaka la go ntwela, botšhabelo bja ka.

3Morena Moretwa, ke mmiditše, mme ka namolelwa diatleng tša manaba a ka.

4Ke be ke rarilwe ke ditlemo tša lehu, ke šetše ke tšhoga dinoka tša kua go se nago maboyo,

5ke kgokilwe ke dithapo tša bodulabahu, ke kgamilwe ke mahuto a lehu.

6Ke tlaletšwe ka bitša Morena, yena Modimo wa ka ka mo hlabošetša lentšu, a kwa mokgoši wa ka a le kua Ngwakong wa gagwe; kgoelelo ya ka ya fihla go yena, ditsebeng tša gagwe.

7Gomme lefase la napa la roromela, la šišinyega, metheo ya dithaba ya kgerega, ya roromela ka gobane a befetšwe.

8Muši wa thunya o etšwa dinkong tša gagwe, mollo wa tšhuma o etšwa ganong ga gagwe.

9A sekamiša magodimo a ologa a gata leswiswi ka dinao tša gagwe.

10O rwelwe ke batuki, o a fofa, o akalala ka diphego tša ledimo.

11O bea leswiswi la mo goragora thoko tšohle; leobo la gagwe ke boso bja madiba, maru a go hwarihlana.

12O pharola maru a gagwe ka legadima la gagwe, gwa napa gwa hlaga sefako le dirumula tša mollo.

13Morena o dumiša maru, Yogodimodimo o hlaba mokgoši, o roma sefako le dirumula tša mollo.

14O betša mesebe ya gagwe a ba šwalalanya; o betša dikgadima ba napa ba tšhoga.

15Gwa bonala meela ya mafula, metheo ya lefase ya apoga. Morena, ke tša mohla o befetšwe, ge go šutša ledimo la kgalefo yago.

16A ntšha letsogo a le legodimong, a ntshwara a nntšha meetseng a magolo,

17A nnamolela diatleng tša lenaba la ka le le maatla, diatleng tša bantlhoi ba ba mpaletšego.

18Ba be ba ntsogetše maatla mohla wa madimabe; mme ka thekgwa ke yena Morena.

19A nntšhetša molaleng, a nnamoletše ka gobane ke mo kgahla.

20Morena o ntlhekile, ka gore ga ke na molato; o ntšhetša a bona diatla tša ka di se ne ditšhila.

21Gobane ke be ke swere tsela tša Morena; yena Modimo wa ka ga nka ka mo hlanogela.

22Ke be ke itebanya le ditaelo tšagwe; ga nka ka ikgaoganya le melao yagwe.

23O nkhweditše ke se ne bosodi, ke itota ke šia molato.

24Morena o ntira se se ntshwanetšego ge ke loka, a bone diatla tša ka di se ne ditšhila.

25Yo botho o go hwetša o le yo botho; monna wa go loka o go hwetša o lokile.

26Moleta o go hwetša o le Moleta; mohlanogi o re: Ga o botege.

27Gobane wena o hlakodiša babotlana; O kokobetša mahlo a go ikgodiša.

28Ke wena o tukišago bone la ka; wena Morena Modimo wa ka o ediša leswiswi la ka.

29Ge ke na le wena, nka šwahlela sera sa manaba; ge ke na le Modimo wa ka, nka sela morako.

30Modimo ke yena; tsela ya gagwe ga e na bosodi; Lentšu la Morena ke seetša; ke yena kotse ya bohle ba ba mmotilego.

31Gobane Modimo ke mang, ge e se yena Morena? Ke mang e a lego lentswe, ge e se yena Modimo wa rena?

32Ke yena Modimo montlhamišamaatla, mofatsela ya ka toko.

33O mphile maoto a kome, o nnametša thaba tša ka.

34O ruta diatla tša ka go hlabana; matsogo a ka a nganga bora bja tshipi.

35O ntshwariša kotse ya phološo ya gago, o nthekga ka tsogo la gago le letona, o nkgodišitše ka boleta bja gago.

36O thuletše dinao tša ka tsela; dikokoilane tša ka ga tša thekesela,

37Ka raka manaba ka ba ka a swara; ga ke gome ke sešo ka a feleletša.

38Ke a pšhatlaganya a se hlwe a kgona go ka tsoga, ka a gata ka dinao tša ka.

39O ntlhama ka maatla a ntwa; bantsogedi o ba kokobetša tlase ga ka.

40Ke wena, ge manaba a ka a nneela dietse, ka fediša ba ba ntlhoilego.

41Ba hlaba mokgoši, ba hloka monamodi; ba bitša Morena, a se ba arabe.

42Ka ba šilakanya ba etša leroleletšewakephefo; ka ba gatakanya ba etša seretse mokgolokgotheng.

43O nnamoletše mohla wa moferefere wa setšhaba; O mpeile mmuši wa bantle.

44Ba nkutlwela ruri ka ditsebe tše di kwago; ke lotšhwa ke batho ba mathoko.

45Ba mathoko ba nolega moko; ba roromela ba etšwa dibong tša bona.

46Morena o gona, Moretwa ke yena lentswe la ka; Yogodimodimo ke yena Modimo wa go mphološa.

47Yena Modimo wa go mpea ka lefetša; a mpea ka buša ditšhaba.

48O nnamoletše mohla manaba a ka a befetšwe, a nkgodiša gara ba ba ntsogetšego; a ntlhakodiša diatleng tša monna e mošoro.

49Ke tšona tseo ke go lebogago tšona ke le gare ga ditšhaba; wena Morena, ke tlotla leina la gago,

50Wena Modiratšekgolo o phološa kgoši ye o e beilego; o dira motlotšwa wa gago ka botho, Dafida leloko la gagwe go ya go ile.