DIPSALME 8 - Northern Sotho 1951/1986（NSO51）

Morena mosetšabathoSefela sa Dafida, sa mohlabeledi, ka pela ya Gathe.

1Morena Mong wa rena! Ina lago le tagile gakakang lefaseng ka moka, wena o ipeetšego borena kua magodimong!

2O itheetše maatla ka melomo ya bana ba masea, ka baka la ba ba go hloyago, gore o kgaiše manaba le bahloi.

3Ge ke bona legodimo le la gago, mediro ya meno ya gago, kgwedi le dinaledi tše, o di beilego,

4ke re motho ke eng, ge o bile o sa mo lebale?

Ngwana wa motho ke eng, ge o bile o mo ela hloko?

5O mo hlaeditše ka gonyane a se be Modimo; wa mo hlama ka borena le letago;

6wa mmušiša mediro ya diatla tša gago; tšohle o di bea ka tlase ga dinao tša gagwe.

7Dinku le dikgomo, ka moka ga tšona, le tšona diphoofolo tša nageng,

8Le dinonyana tša godimo, le dihlapi tša lewatle, tše di thalakanyago mawatle ka mebila.

9Morena Mong wa rena! Ina lago le tagile gakakang lefaseng ka moka.