MMOLEDI 11 - Northern Sotho 1951/1986（NSO51）

Go thakanela sebaka

1Bogobe bja gago bo lahlele bodibeng; o tlo buša wa bo hwetša go fetile mehla e mentši.

2Hlallela ba šupa le ba seswai; ka gobane ga o tsebe kotsi e tlogo wela naga.

3Maru ge a tla le pula, a nošetša naga. Sehlare ge se rengwa, se ka wela thoko ya borwa goba thoko ya leboa; se šala bowelong bja sona.

4Mokwaphefo ga a bjale; kgadiamaru ga a bune.

5Boka tsela ya phefo o sa e hlathe, o sa hlathe le popego ya mašapo ka tswaleng ya moima, le mediro e dirwago ke Modimo a dirago tše go fela ga o e tsebe.

6Bjala peu ya gago e sa le bosasa, le ka mantšiboa atla sago se se khutše; ga o tsebe ye e tlogo mela; goba go tlo mela yeno goba yela, goba ka dipedi.

7Seedi se monate; go bona letšatši go tsefela mahlo.

8Ge motho a phela nywaga e mentši, a a e thabele yohle, a gopole le matšatši a leswiswi, gobane a atile; mme tšohle tše di tlago ke lefela.

9Wena lesogana! Ithabele o sa le bofseng bja gago, o tsefelwa ke matšatši a bofseng bja gago. Swara ka tsela ye o e ratago, ye mahlo a gago a e thabelago; fela, o tsebe gobane Modimo o tlo go sekiša tšeo tšohle.

10Se hlohle pelo ya gago, mme mmele wa gago o o šegele bošula; gobane bosogana le hlogo e ntsho ke lefela.