1Naomi matswalagwe a bolela le yena a re: Ngwanaka, a nka se go nyakele bokhutšo mo o tlogo phela gabotse?
2O tsebe gore Boase, yo o bego o na le basetsana ba gagwe, ke motho wa gešo. Bjale bošego bjo o tlo iša mabele seboeng.
3Napa o hlape o tlole, o apare tšona diaparo tša gago, o theogele seboeng. Fela, o bone gore monna eo a se ke a go tseba a sešo a fetša go ja le go nwa.
4Gomme e tlo re ge a yo robala, o šetše felo a robalago ntshe; o tsene gona moo o apole maoto a gagwe o lale. Ke mo yena a tlogo go botša se o swanetšego go se dira.
5Ruthe a fetola a re: Ke tlo dira tšona tšeo o mpoditšego tšona.
6A napa a fologela seboeng, a dira ka mokgwa woo matswalagwe a mo laetšego ka gona.
7Boase ge a lle a nwile, pelo ya gagwe e ekwa bose, a yo robala a khutile ka lethala. Ruthe a nanya a tla, a ikalela maotong a Boase, a robala.
8Mašegogare monna eo a phafoga a okamela, a bona ka mo maotong a gagwe go robetše mosadi.
9A botšiša a re: O mang?
Ruthe a re: Ke nna Ruthe, molata wa gago. Phurolla diphego tša gago, molata wa gago a khute; ka gobane mohunolodi wa ka ke wena.
10Boase a re: A Morena a go šegofatše, ngwanaka. Lerato la gago la bjale le phadiša la pele, ka ge o sa ka wa latela banna ba bafsa ba bahumanegi le ba bahumi.
11Bjale, ngwanaka, o se ke wa boifa! Tše o di boletšego ke tlo go dira tšona; ka gobane motse ka moka wa selete sa gešo o tseba ge o le mosadi wa sethakga.
12O rerešitše ge o re mohunolodi ke nna; fela, go sa na le mohunolodi e a go lebanego go fetiša nna.
13Lala moo bošego bjo. Ge ka moswana a ka go hunolla, e tla ba mo go botse; a a go hunolle. Ge a ka gana go go hunolla, gona -- ka bophelo bja Morena -- o tlo hunollwa ke nna. Robala moo go be go se.
14A robala gona moo maotong a gagwe gwa ba gwa sa; a tsoga motho a sešo a kgona go tsebana le e mongwe, ka gobane Boase o be a re, go se ke gwa tsebja ge fa seboeng go tlile mosadi.
15Gomme Boase a re: Tšiša kobo yeo o e aperego, o e sware. A e swara, Boase a mo tšhelela mabele a ntlatla tše di selelago, a mo rweša; Ruthe a tsebo boela motseng.
16A tla go matswalagwe, a thwe: Go bjang, ngwanaka?
Ruthe a mo anegela tšohle tše monna yola a mo dirilego tšona,
17a re: O mphile mabele a ntlatla tše di selelago, a re: O se ke wa boela go matswalago o le fela.
18Naomi a re: Ngwanaka, dula o lebelelele mo taba ye e išago ntshe; gobane monna yoo a ka se ke a dula fase a sešo a phetha taba yeo lehono.
Who We AreWhat We EelieveWhat We Do
2025 by iamachristian.org,Inc All rights reserved.
