JOBO 41 - Northern Sotho 1951/1986（NSO51）

Modimo o sa šupa bogolo bja dibopša tša gagwe

1Ka kgonthe, le ge o ipotile, o a aketša! O tlo re o sa e bona wa repha ditho.

2Ga go wa mahlahlo a kago e hlohla. -- Ke mang a kago ema a lwa le nna?

3E a nneilego selo ke mang, a re ke mmušetše? Tša ka tlase ga leratadima lohle ke tša ka. --

4Nka se lese go bolela le ditho tša yona, ke ra maatla le mmele wa yona.

5Ke mang a kago phaola mphaphathi ya kobo ya yona? Ke mang a kago batamela tšharara ya mahlagareng ya yona?

6Ke mang a kago bula mamati ao a mahlong a yona? Mo go lego meno a yona ke gona dipoifong.

7Matsaka ke melokoloko ya dikotse tša yona, makgamathi a go swaragana a tiile.

8A hlatlagana a lomane, go se šale le lenga mo gare ga ona.

9A kgotlane, a hlakane, ga a amologane.

10Ge e ethimola go phadima seetša; mahlo a yona a etša mahlasedi a mahuba.

11Leganong la yona go tšwa dirumola, go tšwa dihlase tša mollo.

12Dinko tša yona di thunya meuši, boka pitša ye e bedišwago ka dihlaka.

13Mohemo wa yona o tšhuma magala; mo ganong ga yona go hlaga kgabo ya mollo.

14Molala wa yona, ke gona go dutšego maatla a yona; e etiwa pele ke tlhobogo.

15Mahlakore a mmele wa yona ke a mathata, a tiile, ga a tekateke.

16Pelo ya yona ke e thata boka lebje, e tiile boka tšhilo.

17Ge e tsoga, le bagale ba a šia; ba gakanega ba tšhogile.

18Ge ba e betša ka lerumo, ga le e dire selo, le ge e le tšhoša, le ge e le mosebe, goba letsolo.

19Tshipi e e sema bjang; mphiri e o sema phata ye e bodilego.

20Mosebe o tšwago boreng o ka se ke wa e tšhabiša; maswika a seragamabje go yona ke dinono.

21Thoka e re ke lehlaka; e tshega tšhoša ge e menegana.

22Mpa ya yona ke makgwathi a bogale, e thula mogoga mohlakeng.

23E seloša noka boka pitša ge e bela; e hudua letsha bjalo ka legapa la moreku.

24Ge e feta, mohlala o šala o taga, bodiba o ka re ke boputswa bja moriri.

25Mo faseng ga go na sekayona; e bopetšwe go se šie.

26Dioka ka moka e di lebelela e le yona kgoši ya tšohle tše di ipotilego.