RUTHE 2 - Northern Sotho 1951/1986（NSO51）

Ruthe o tla tšhemong ya Boase

1Go be go na le monna e mongwe, motswalo wa mogatša Naomi, monna wa lehumagedi wa leloko la Elimeleke; leina la gagwe e be e le Boase.

2Ruthe mosadi wa ga Moaba a bolela le Naomi a re: Lesa ke ye mašemong ke tope diako, ke latele e a kago ntira ka botho.

Naomi a fetola a re: Sepela, ngwanaka.

3Ruthe a ya a topa diako mašemong, a latela basegi; a ba a tsena tšhemong e nngwe ya mašemo a Boase, monna wa moloko wa Elimeleke.

4Gwa napa gwa tla yena Boase a etšwa Betlehema, a bona basegi a re: Morena a be le lena!

Bona ba re: Morena a go šegofatše!

5Boase a botšiša mohlanka wa gagwe e lego mohlapetši wa basegi a re: Mosetsana eo ke wa mang?

6Mohlapetši wa basegi a re: Ke mosetsana yola wa ga Moaba e a tlilego le Naomi a etšwa gona kua nageng ya Moaba.

7O itše ke mo dumelele go topa diako mo gare ga dingata a latela basegi. O tlile e sa le bosasa, a hlwa a eme go fihla bjalo; kua gae ga a dule a diega.

8Boase a bolela le Ruthe a re: A o a nkwa, ngwanaka? O se ke wa yo topa tšhemong e nngwe; le gona o se ke wa tloga mo; o hlwe le basetsana ba ka.

9O bone mo ba segago fa tšhemong mme o ba latele. Bahlanka ba ka ke ba laetše gore ba se ke ba go tshwenya. Ge o ekwa lenyora o ye fao meeteng o nwe meetse a gilwego ke bahlanka ba ka.

10Ruthe a phuhlama a lotšha a inametše fase, a bolela a re: Botho bjo mahlong a gago ke bo hwetša ka baka lang? Etšwe ke le motho wa mohuta o šele!

11Boase a fetola a re: Tše o di dirilego matswalago mola a hwetšwe ke monna wa gagwe, ba ntsebišitše gabotse tšohle, ka mo o tlogetšego tatago le mmago le naga ya geno, wa tla mo setšhabeng se o bego o sa se tsebe.

12Morena a a go bušetše tše o di dirilego; moputso o tletšego o o fiwe ke Morena Modimo wa Isiraele, yo o tlilego go khuta ka tlase ga diphego tša gagwe.

13Ruthe a re: Ke hwetša mahlo a gago a ntebeletše ka botho, morenaka, ka gobane o nkhomoditše, o nkhutšišitše pelo, nna ke lego molata wa gago le ge ke sa lekane le bahlanka ba gago ba.

14Boase a re: Ka lebaka la go ja o batamele mo, o je bogobe o ine thatana ya gago motogong. Bjale Ruthe a hlwa le basegi; Boase a mo neela dipabe; a ja a khora, a ba a šadiša.

15Ya re ge a boela go yo topa diako, Boase a laela bahlanka a re: Mo leseng a tope le mo gare ga dingata; le se ke la mo leša dihlong.

16Le mo hlomolele le diako tša mo dingateng, le di tlogele a tle a tope; le se ke la mo omanya.

17Ruthe a hlwa a topa a le moo mašemong, la ba la rapama. A fola tše a di topilego, a nyako tlatša seroto ka mabele.

18A a rwala a tla motseng; matswalagwe a bona tše a di topilego. Ruthe a ntšha a mo nea dipabe tše a di šadišitšego mola a eja.

19Matswalagwe a mmotšiša a re: O tšo topa kae lehono? O hlwile o dira kae? A go šegofatšwe yena eo a go thakgilego.

Ruthe a mmotša mo a dirilego ntshe, a re: Leina la monna eo ke hlwilego ke dira tšhemong ya gagwe lehono, ke Boase.

20Naomi a re: A a šegofatšwe ke Morena e a sa hlokišego ba ba phelago le ba ba hwilego botho bja gagwe. Naomi a botša Ruthe a re: Monna eo ke moloko wa borena; ke yena e mongwe wa bahunolodi ba rena.

21Ruthe mosadi wa ga Moaba a re: Le gona monna eo o mpoditše a re ke fele ke latele bahlanka ba gagwe, ba be ba fetše go buna tše a di bunago.

22Naomi a botša Ruthe ngwetši wa gagwe a re: Ngwanaka, ke mo go botse ge o ka tšwa le basetsana ba gagwe; ke gona o sa tlogo tshwenywa ke batho mašemong a šele.

23Ruthe a fela a etšwa le bona basetsana bao ba Boase, a hlwa a topa diako, puno ya mabele ya ba ya fela; a tsebo boela go matswalagwe.