DIPSALME 39 - Northern Sotho 1951/1986（NSO51）

Thapelo ya mollakhutšoYa mohlabeledi wa “Jeduthune”. Sefela sa Dafida.

1Ke be ke re ke tlo hlokomela tsela ya ka, gore ke se senye ka leleme; ka re molomo wa ka ke tlo o swara ka mogala, ge ke sa fela ke lebane le yo mobe.

2Ka etša semuma ke itše “tuu”; ka itlhokiša tše botse ka se bolele; mme bohloko bja nkgolela.

3Pelo ya ka ya swa ka teng ga ka; ge ke eya le kgopolo, ya ba mollo o tukago; ka ba ka bolela ka leleme la ka.

4Morena, nkgopotše boyo bja ka le bokae bja matšatši a ka; ke tsebe gobane ke motho wa lefelafela.

5Ka kgonthe o mpeetše matšatši a sa išego kgole; pele ga gago phelo bja ka ga se selo; motho mang le mang ke lefelafela, mola a re ke eme.

6Ruri, motho o feta bo ka thiti; ruri, o itapisetša tša lefela; o thota a sa tsebe moji.

7Bjale nna, ke sa holofelang? Mongaka, ke hlologetšwe wena fela.

8Mphološe mo dibeng tša ka tšohle; se ntire sekwero sa batho ba mašilo.

9Nna ke tlo homola; nka se ke ka bolela selo, gobane ke wena o di dirilego.

10Gomiša dikotlo tša gago go nna, gobane ke fela ka kgati ya seatla sa gago.

11Ge o sola motho o mo otla a na le molato, o senya bothakga bja gagwe bjalo ka serurubele. Ruri, motho mang le mang ke lefelafela.

12Morena, kwaa thapelo ya ka; o utlwele ruri ge ke goeletša. Se nyatše megokgo ya ka.

13Gobane ke moeng ke le fa go wena; ke modiiledi bjalo ka botatawešo bohle.

14Lesa go hlwa o ntšheditše, ke tle ke we pelo, ke sešo ka tloga ka se hlwe ke eba gona.