DIPSALME 77 - Northern Sotho 1951/1986（NSO51）

Mokgoši tlalelongYa mohlabeledi ka “Jeduthune”, sefela sa Asafa.

1Ke bitša Modimo; ke hlaba mokgoši; ke mo hlabošetša lentšu. O tlo ba a nkwa.

2Ke mohla wa tlalelo; ke nyaka wena Mong a ka; ke lala ke emiša diatla tša ka ke sa lape; pelo ya ka ga e homotšege.

3Ke gopola Modimo ke fegelwa, ke akanya pelo ya ka e dumala.

4Dintšhi tša mahlo a ka di swerwe ke wena, ke hlobogile, ga ke sa kgona go bolela.

5Ke gopola tša mehla ya kgale, tša nywaga ya bogologolo.

6Ke lala ke gopola tša mola ke bina dikoša; ke re ke fepeletše pelo ya ka; mme moya wa ka o nyaka tsela,

7A Morena o hladile ya ba mokamoka? A a ka se ke a hlwa a gaugela?

8A botho bja gagwe bo feletše ruri? Kholofedišo a e senyegetše ditlogolo le ditlogolwana?

9A Modimo o gakilwe ke go gaugela? A o kgonyeletše tlhomogelo ya gagwe ka sekgoro?

10Mme nna ke re: Ke bjona bohloko bja ka bjo: Letsogo le letona la Yogodimodimo le phekgogile.

11Ke gopola ditiro tša Morena. Ruri, ke gopola mehlolo yago ya bogologolo.

12Ke elelwa ditiro tša gago ka moka; ke akanya tše wena o di dirilego.

13Modimo, tsela ya gago e ya ka tše kgethwa; o kae modimo e a kago lekana le wena Modimo?

14O Modimo modiramehlolo; maatla a gago o a bonaditše ditšhabeng.

15Sa gago setšhaba o se namoletše ka letsogo la gago, bona bana ba Jakobo ba, le ba Josefa.

16Meetse a go bone, wena Modimo. Meetse a go bone a tšhoga, le madiba a huduega.

17Maru a tšholla meetse, maru a duma, gwa betšwa mesebe ya gago.

18Lentšu la gago la medumo la na la dikologa, dikgadima tša fafanyega gohle; lefase la roromela la šišinyega.

19Tsela ya gago ya phatša lewatle, mmila wa gago wa tšwa ka gare ga madiba a magolo; mme gwa se ke gwa tsebja lwao la gago.

20Setšhaba sa gago wa se sepediša bjalo ka mohlape ka Moshe le ka Arone.