DIPSALME 115 - Northern Sotho 1951/1986（NSO51）

Bogolo bja Modimo wa rena

1Morena, ga se la rena, ga se le rena leina, ke la gago le re rego a le retwe, gobane yo botho le yo potego ke wena.

2Ba reng ba ditšhaba ge ba re: Modimo wa bona o kae?

3Kganthe Modimo wa rena o kua magodimong, mme o dira tšohle tše di mo kgahlago.

4Ya bona medimo ke ya silifera le gauta, e dirwa ke diatla tša batho.

5E na le melomo, mme ga e bolele; e na le mahlo, mme ga e bone.

6E na le ditsebe, mme ga e kwe; e na le dinko, gomme ga e dupe.

7E na le diatla, gomme ga e sware; e na le dinao, mme ga e sepele; ga go ne lentšu le tšwago megolong ya yona.

8Babopi ba yona ba swana le yona, le bohle ba e botilego.

9Baisiraele ba bota Morena; wa go ba thuša, wa go ba kotse ya bona ke yena.

10Ba leloko la Arone ba bota Morena; wa go ba thuša, wa go ba kotse ya bona ke yena.

11Ba ba boifago Morena ba mmote, yena Morena wa go ba thuša, wa go ba kotse ya bona.

12Morena ga a re lebale, o a šegofatša; o šegofatša ba leloko la Isiraele; o šegofatša ba leloko la Arone.

13O šegofatša ba ba mmoifago, ba banyenyane le ba bagolo.

14Morena o tlo le atiša, lena le bana ba lena.

15Le bašegofatšwa ba Morena e a dirilego legodimo le lefase.

16Magodimo ke magodimo a Morena; mme lefase o le neetše bana ba batho.

17Bahu bona le ba fologetšego kua go lego khomolelo, ga ba rete Morena.

18Ge e le rena, re reta Morena go tloga bjale le go ya go ile.