LEFITIKO 14 - Northern Sotho 1951/1986（NSO51）

Wa lephera ge a fodile

1Morena o boletše le Moshe a re:

2Melao še ya mohla wa lephera a tlogo thwe: o sekile. A a išwe go moperisita.

3Moperisita a a tšwele ka ntle ga mešasa. E tlo re ge a nyakorela a hwetša bolwetši bja lephera bo fodile, bo tlogetše motho eo e a bego a pherile,

4gona a laele gore mohlatswiwa a tliše dinonyana tše pedi di sa phela, tše di sekilego; a tliše le legong la marokane, le moretele, le sefokana sa lehlakanoka.

5Moperisita a laele gore nonyana e nngwe e hlabelwe moeteng o nago le meetse a mothopo.

6Nonyana ye e phelago a e tšee a e ine mo meetseng a mothopo a nago le madi a nonyana ye e hlabetšwego moo, a ine le legong la marokane, le moretele, le sefokana,

7a fokele mohlatswiwa-lephera eo, a dire gašupa, a tsebo re: o thakgafetše. Nonyana ye e phelago a e lese e fofe e boele šokeng.

8Mohlatswiwa a hlatswe diaparo tša gagwe, a boolwe meriri ka moka, a hlape meetseng; o sekile. A tsebo tla mešašeng; fela, a dule ka ntle ga ngwako wa gagwe matšatši a šupago.

9Ka la go šupa a boolwe meriri ka moka, le hlogo, le maledu, le dintši tša mahlo, meriri ka moka; a hlatswe diaparo, a hlape mmele; ke moka, o sekile.

10Ka la seswai a hlaole dikwanyana tše pedi tše di se nago bosodi le kwana e tee ya ngwaga o tee; a tliše ntlatla ya bupi bjo bo tšhetšwego makhura, le lefiswana le le nago le makhura.

11Gomme moperisita, yena mohlatswi, a emiše motho eo wa mohlatswiwa pele ga Morena, mojako wa Ngwako wa Kgwerano.

12Moperisita a tšee kwana e nngwe, a e tliše e be selefa, le lefiswana la makhura; a di ekare e be seekaro pele ga Morena.

13Kwana eo a e hlabe mo go hlabelwago diloba le dihlabelo, felo gokgethwa; ka gobane selefa le seloba ke tša moperisita, ke tše kgethwakgethwa.

14Gomme moperisita a kgwathe madi a selefa, a fetše lerephu la tsebe ya le letona ya mohlatswiwa ka ona, le mono o mogolo wa seatla sa gagwe sa le letona, le mono o mogolo wa leoto la gagwe la le letona.

15Moperisita a tšee makhura lefiswaneng, a a tšhele seatleng sa gagwe sa la ntsogošo.

16A ine monwana wa gagwe wa le letona mo makhureng a mo seatleng sa gagwe sa la ntsogošo, mme a fokele pele ga Morena, a dire gašupa.

17Makhura a a šetšego seatleng sa gagwe, a fetše lerephu la tsebe ya le letona ya mohlatswiwa, le mono o mogolo wa seatla sa gagwe sa le letona, le mono o mogolo wa lenao la gagwe la le letona, mo go lego madi ala a selefa.

18Makhura a šalago seatleng sa gagwe a a tšhele mo hlogong ya mohlatswiwa, a kgone go mo direla poelanyo go Morena.

19Moperisita a tliše seloba, a direle mohlatswiwa poelanyo ka baka la ditšhila tša gagwe, a tsebo hlaba sehlabelo.

20Sehlabelo le sebego moperisita a di tliše aletareng; e be gona go mo direla poelanyo gore a sekege.

21Ge motho eo e le modiidi e a hlaelwago ke tšeo, gona a ntšhe kwana ya selefa sa seekaro, ya ba go mo direla poelanyo. A tliše le ntlatlana ya bupi bjo bo tšhetšwego makhura, e be sebego, le lefiswana la makhura,

22le mekurwanyana e mebedi, goba maebana a mabedi, ka mo a kgonago; le lengwe e tlo ba la seloba, le lengwe e tlo ba la sehlabelo.

23A a di tliše ka tšatši la seswai la tlhatso ya gagwe; a di tliše mojako wa Ngwako wa Kgwerano pele ga Morena.

24Moperisita a tšee kwana yeo ya selefa le lefiswana la makhura, a di ekare pele ga Morena.

25A hlabe kwana yeo ya selefa, a kgwathe madi a yona a fetše lerephu la tsebe ya le letona ya mohlatswiwa, le mono o mogolo wa seatla sa gagwe sa le letona, le mono o mogolo wa lenao la gagwe la le letona;

26a tšhele makhura mo seatleng sa gagwe sa la ntsogošo.

27Makhura ao a seatleng sa gagwe a la ntsogošo a a fokele pele ga Morena ka monwana wa le letona, a dire gašupa.

28Makhura ao a a šetšego seatleng sa gagwe sa le letona, a a fetše lerephu la tsebe ya le letona ya mohlatswiwa ka ona, le mono o mogolo wa seatla sa le letona sa gagwe, le mono o mogolo wa lenao la gagwe le letona, mo go lego madi ala a selefa.

29Makhura a a šetšego seatleng sa moperisita a a tšhele mo hlogong ya mohlatswiwa, e be go mo direla poelanyo pele ga Morena.

30Ke mo mohlatswiwa a tlogo hlaba mokurwanyana o mongwe, goba leebana le lengwe, ka mo a kgonago ka gona.

31A dire ka mo a kgonago ka gona. Le lengwe e be la selefa; le lengwe e be la sehlabelo, a tle le sebego; gomme moperisita a direle mohlatswiwa eo poelanyo pele ga Morena.

32Ke wona molao o lebanego motho e a bego a na le bolwetši bja lephera, a hlaelelwa tša tlhatso ya gagwe.

33Morena o boletše le Moshe a re:

34Ge le tlo ba le fihlile nageng ya Kanana, ye nna ke le filego yona gore e be ya lena, gomme ge ke tlo tšweletša bolwetši bja lephera mo ntlong e nngwe ya nageng ya geno,

35gona mong wa ntlo a tle a tsebiše moperisita, a re: Ke bona eke go na le bolwetši ntlong ya ka.

36Moperisita -- a sešo a tla go nyakorela bolwetši bjoo -- a laele a re dilo ka moka tše di lego ntlong yeo di phahlolwe ntle, gore di se ke tša tšhilafala. Ke mo moperisita a tlogo tsena a nyakorela ntlo yeo.

37Ge a nyakorela a bona bolwetši bo le lebotong la ntlo, a hwetša e le diphobe tše ditalana tša bohubetšwana, di phobetše lebotong,

38gona a tšwe ntlong ka mojako, mme a e tswalele matšatši a šupago.

39Ge a tlo boa ka la go šupa, a hwetša bolwetši bo kekile lebotong la ntlo,

40gona a laele gore go phušulwe, mme makokota a a nago le bolwetši bjoo a lahlelwe ntle ga motse sethobolong.

41Mme ntlo ka gare e gopiwe mo go fela, letlala le le gopilwego le ntšhetšwe ka ntle ga motse sethobolong.

42Go tšewe makokota a mangwe a tsenywe madulong a ala, go tšewe leraga le lengwe, mme ba kgakgaphe ntlo.

43Ge bolwetši bo ka boa mo ntlong yeo, mola go šetše go ntšhitšwe makokota, go gopilwe, go kgakgaphilwe,

44mme moperisita a tla a nyakorela, a hwetša bolwetši bo kekile ntlong, gona ke lephera le lešoro la ntlong; ntlo yeo e tšhilafetše.

45Gona ntlo yeo e phušulwe; makokota a yona, le dikwata tša yona, le maboto a ntlo, ka moka di ntšhetšwe ntle ga motse sethobolong.

46E a kago tsena ntlong e bjalo mohla e šetše e tswaletšwe, o tšhilafetše go fihla mantšiboa.

47E a kago robala ntlong e bjalo a a hlatswe diaparo tša gagwe. Le e a jetšego ntlong e bjalo, a hlatswe diaparo tša gagwe.

48Ge moperisita a etla go nyakorela ntlo, a hwetša bolwetši bo sa keka mo ntlong mo go kgakgaphilwego, gona moperisita a a re: e sekile, bolwetši bo tšwile.

49A tšee seloba sa ntlo yeo, sa nonyana tše pedi, le legong la marokane, le moretele, le sefokana sa lehlakanoka.

50Nonyana e nngwe a e hlabele pitšeng, mo meetseng a mothopo.

51A tšee legong la marokane, le sefokana sa lehlakanoka, le moretele, le nonyana e phelago, a di ine mo mading a nonyana e hlabetšwego mo meetseng a mothopo, mme a fokele ntlo yeo a dire gašupa.

52E be go hlatswa ntlo yeo ka madi a nonyana le ka meetse a mothopo, le ka nonyana e phelago, le ka legong la marokane, le ka sefokana sa lehlakanoka, le ka moretele.

53Ge e le nonyana e phelago, a e lesetše ka ntle ga motse e fofe e boele šokeng. E be gona go direla ntlo poelanyo, e sekege.

54Ke yona melao ya bolwetši bja lephera la mehutahuta, le ya sebabo,

55le ya lephera la diaparo, le la ntlo;

56le ya sekutu, le dišo, le mebala e mesehlana.

57Ke ya gore go rutwe go tseba mohla selo se tšhilafetše, le ge se sekile; ke yona melao ya lephera.