1 DIKGOŠI 13 - Northern Sotho 1951/1986（NSO51）

Pušo ya Jerobeama; moporofeta o a tla a mo sola

1A bona go etla monna wa Modimo a etšwa Juda ka lentšu la Morena; a fihla Bethele mola Jerobeama a eme aletareng a thuntšha diorelo.

2Monna eo wa Modimo a lebana le aletare a goeletša a romilwe ke Morena a re: Aletare! Aletare! Morena o re: Go tlo belegwa morwa wa leloko la Dafida; leina la gagwe e tlo ba Josia. Yena eo, baperisita ba moto wo, ba ba thuntšhago diorelo felo fa, o tlo ba swara a ba dira dihlabelo mo go wena, a fiša marapo a batho mo go wena.

3Le gona Morena o dira mohlolo lehono fa aletareng ye yena a bolelago nayo; o re: Se le tlogo bona ka sona ge go boletše Morena, ke ge aletare ye e fatoga, gwa falala melora e lego mo go yona.

4Ge kgoši Jerobeama a ekwa se monna wa Modimo a se bolelago ka baka la aletare ya Bethele, a akga letsogo a re: Mo swareng! Gomme letsogo la gagwe le a le akgilego la omelela, a šitwa go le hunyetša.

5Aletare ya fatoga, melora ya falala; ya ba wona mohlolo wo monna eo wa Modimo a o dirilego a romilwe ke Morena.

6Bjale kgoši ya kgopela monna wa Modimo ya re: A ko fepeletše sefahlogo sa Morena Modimo wa gago, o nthapelele gore letsogo la ka le boele go nna.

Monna wa Modimo a fepeletša sefahlogo sa Morena; letsogo la kgoši la hunyetšwa, la ba bjalo ka peleng.

7Gomme kgoši ya bolela le monna wa Modimo ya re: Tlaa go nna ka ngwakong, o lapologe; ke tlo go nea mpho.

8Monna wa Modimo a fetola a re: Le ge o ka nkarolela ngwako wa gago ka bogare, nka se ke ka ya le wena ka ja bogobe felo fa, goba ka nwa meetse.

9Nna lentšu la Modimo le ntaetše la re: O se ke wa ja bogobe wa nwa meetse; le gona o se ke wa boa ka tsela ye o yago ka yona.

10A realo mme a wela tsela, a swara ka e šele, e sego yela a tlilego Bethele ka yona.

11Bjale gona moo Bethele go be go agile moporofeta e mongwe wa mokgalabje. Barwa ba gagwe ba tla ba mmotša tše monna yola wa Modimo a di dirilego moo Bethele mohla woo; le mantšu a a a boletšego le kgoši ba botša tatabo.

12Tatabo a botšiša a re: O tšere ka tsela efe? Barwa ba gagwe ba mo laetša tsela ye monna wa Modimo wa Juda a tlogilego ka yona.

13A laela barwa ba gagwe a re: Ntlemeleng pokolo! Ba e tlema mme a namela.

14A latela monna yola wa Modimo, a mo hwetša a dutše moriting wa morula, a mo rera a re: A ke wena monna wa Modimo e a tšwago Juda?

Yola a re: Ke nna.

15Yena a re: Tlaa o ye le nna ka gae, o je bogobe.

16Yola a re: Ga ke kgone go goma le wena le go tla ga gago; nka se ke ka ja bogobe ka nwa meetse le wena felo fa;

17gobane ke boditšwe ke lentšu la Morena gwa thwe: O se ke wa ja bogobe wa nwa meetse ntshe; mme o se ke wa boa ka tsela ye o yago ka yona.

18Yena a re: Le nna ke moporofeta bjalo ka wena. Nna Morongwa wa Modimo o ntaetše a romilwe ke Morena a re: Mo gomiše, a tle nago lapeng la gago, a je bogobe a nwe meetse. Kganthe o be a mo fora.

19Gomme a goma nae, ba tla, a ja bogobe lapeng le monna eo, a nwa meetse.

20Ba re ba sa dutše dijong, moporofeta eo a mo gomišitšego a tlelwa ke lentšu la Morena,

21a hlaboša lentšu a bolela le monna wa Modimo e a tšwago Juda a re: Morena o re, ka ge o ganne molomo wa Morena, wa se ke wa dira ka mo Morena Modimo wa gago a go laetšego ka gona,

22wa goma, wa ja bogobe wa nwa meetse felo fa, mola a go boditše a re: O se ke wa ja bogobe wa nwa meetse felo fa, bjale setoto sa gago se ka se ke sa fihla lebitleng la botatago.

23A re a lle bogobe a nwile meetse, a tlema pokolo ya gagwe, mme moporofeta yola a namela.

24A le tseleng a gahlana le tau, ya mmolaya; gomme setoto sa gagwe sa rapalala tseleng; pokolo ya ema hleng ga gagwe; gomme tau e emeletše setoto.

25Ya re ge batho ba feta, ba bona setoto se rapaletše tseleng, tau e emeletše setoto; ba tla ba botša ba motseng mo go agilego moporofeta yola wa mokgalabje.

26Moporofeta yo a mo gomišitšego, ge a di kwa, a re: Ke monna yola wa Modimo a gannego molomo wa Morena. Bjale Morena o mo gafetše tau ya mmolaya, ka mo Morena a mmoditšego ka gona.

27A roma barwa ba gagwe a re: Ntlemeleng pokolo. Ba napa ba e tlema.

28A ya a hwetša setoto sa motho yola se rapaletše tseleng, pokolo le tau di eme hleng ga setoto, tau e sa ka ya ja setoto, e sa ka ya bolaya pokolo.

29Moporofeta wa mokgalabje a kuka setoto sa monna wa Modimo, a se beleša pokolo, a goma a na naso; a fihla motseng a mo llela, a mmoloka.

30Setoto sa gagwe o se beile lebitleng la gagwe, a mo llela a re: Joo, ngwanešo, joo!

31Ba re go mmoloka, a bolela le barwa ba gagwe a re: E re mohla ke hwago, le mpolokeng lebitleng le monna wa Modimo a bolokilwego go lona; mašapo a ka a batagane le a gagwe.

32Gobane tše a bego a goeletša ka tšona aletareng ya Bethele di tlo tšwelela mo nywakong ka moka ya mo mebotong e lego metseng ya Samaria.

33Jerobeama yena, le ge go diregile taba tše bjalo, ga a ka a lahla tsela tše mpe tša gagwe, a fela a bea baperisita ba mebotong a ba hlaola mo setšhabeng ka moka. Mang le mang e a ratago a mmea a ba moperisita wa mmotong.

34Taba ye e be e le sona sebe sa ba leloko la Jerobeama; ke sona se se ba tlišeditšego go senyega le go fedišwa mo lefaseng.