BAHEBERE 4 - Northern Sotho 1951/1986（NSO51）

Go tšena khutšong ya setšhaba sa Modimo

1A re boifeng ge gore go se be le o tee wa lena e a kago šalela mola kholofedišo ya go tsena khutšong e sa le gona.

2Gobane taba e botse yeo, le rena re e boditšwe bjalo ka bona. Fela, bona lentšu le ga la ka la ba thuša selo ka ge le sa ka la hlakana le tumelo ya bakwi ba lona.

3Ge e le rena ba re dumelago, re ba go tsena khutšong yeo e boletšwego ge go thwe: Ke mo ke ennego ke befetšwe ka re: Ba ka se ke ba tsena khutšong ya ka! Gomme mediro ya Modimo e phethegile mola a theile lefase;

4gobane go na le mo go boletšwego letšatši la go šupa ka go re: Ka letšatši la go šupa Modimo a khutša a feditše mediro ya gagwe ka moka.

5Gomme fa gwa buša gwa thwe: Ba ka se ke ba tsena khutšong ya ka;

6ke go re go sa na le mo ba bangwe ba tlogo tsena khutšong; gomme ba go botšwa taba e botše ye mehla yela ga ba ka ba tsena ka go se kwe.

7A buša a bea letšatši le lengwe la go thwe: “Lehono”; ke mola a bolela ka Dafida ge go fetile lebaka le letelele, a tla a re: Lehono ge le ekwa lentšu la gagwe, le se ke la retela dipelo.

8Le gona ge Joshua e ka be e le yena wa go ba iša khutšong, a ka be a sa ka a boeletša a realo ge go fetile mehla yeo.

9Ke gona ge, go sa na le khutšo ya Sabatha ye e šaletšego setšhaba sa Modimo.

10Gobane e a tsenego khutšong yeo ya Modimo, le yena o khutša a phethile mediro ya gagwe bjalo ka Modimo ge a khutšitše a phethile ya gagwe.

11A re phegeleleng ge go tsena khutšong yeo, gore go se be le e a wago a etša bala ba go se kwe.

12Gobane lentšu la Modimo ke le le phelago, ke le maatla; ka bogale le phala tšhoša efe le efe ya magale a mabedi; gomme le phololetša la ba la aroganya pelo le moya, le malokololo le moko; mme le tseba go fenyeka diakanyo le kgopolo tša pelo.

13Gomme ga go sebopša se se kago mo širela; tšohle o di bona di hlobotše di khurumolotšwe. Gomme ke yena yo re nago le taba le yena.

14Bjale, ge re na le Moperisita e Mogolo yo mokaakaa, e a tsenego a fihla moseo wa magodimo, yena Jesu Morwa wa Modimo, a re tiišeng go ipolela ka tumelo.

15Gobane Moperisita e mogolo e lego wa rena, ga se a kago šitwa go re kwela bohloko ge re fokola; ke e a lekilwego mo go tšohle bjalo ka rena; fela, ga a na sebe.

16Ke gona, a re batameleng re holofetše, re tle madulong ao a kgaugelo, re tle re amogele tšhokelo, re hwetše kgaugelo ya go hlakodišwa lebakeng la gona.