1Morena o a buša! A lefase le hlalale, go thabe le dihlakehlake ka boati bja tšona.
2O dikologwa ke maru le leswiswi; sedulo sagwe sa bogoši se theilwe ka toko le molao.
3Mollo o mo eta pele, o tšhuma manaba a gagwe thoko tšhole.
4Dikgadima tša gagwe di ediša thetebudi; lefase, ge le di bona, le a roromela.
5Dithaba di tologa boka moti wa dinose pele ga sefahlego sa Morena, sa yena Mong wa lona lefase lohle.
6Magodimo a tumiša go loka ga gagwe, mme ditšhaba tšohle di bona borena bja gagwe.
7Bohle ba ba hlankelago diswantšho, ba kgantšha medimo, ba tlo lewa ke dihlong; medimo ka moka e lotšha yena.
8Motse wa Tsione o di kwile, gomme o thabile barwedi ba Juda ba hlalalela dikahlolo tšago, Morena.
9Gobane Yogodimodimo, Moukamafaselohle, ke wena Morena. O phagamile kudu godimo ga medimo yohle.
10Hee lena barata Modimo, hloyang bobe. Ke yena molotodi wa meoya ya baratwa ba gagwe; o ba namolela diatleng tša bakgopo.
11Seedi se bjaletšwe ba ba lokilego; ba dipelo tša go loka ba bjaletšwe thabo.
12Lena baloki, thabelang Morena, le lebogeng le leina lekgethwa la gagwe.
Who We AreWhat We EelieveWhat We Do
2025 by iamachristian.org,Inc All rights reserved.
