1Samuele a tla a bolela le Saulo a re: Ke nna yo Morena a kilego a nthoma, ka go tlotša wa ba kgoši ya setšhaba sa gagwe sa Isiraele. Bjale theetša se Morena a se bolelago.
2Morena wa Mašaba o re: Ga nka ka lebala tše Baamaleke ba kilego ba di dira Baisiraele, ge ba ba thibela tsela mola ba etšwa Egipita.
3Bjale yaa o bolaye Baamaleke. Tšohle tše e lego tša bona o di dire digafiwamoka. O se ke wa ba tsebafela; o bolaye banna le basadi le bana le masea, le dikgomo le dinku le dikamela le diphoofolo.
4Saulo e epa dira, a di bala Telaima, ya ba banna ba dikete tše makgolo a mabedi ba bahlabani, le banna ba dikete tše lesome ba Juda.
5Ya re ge Saulo a fihla motseng wa Baamaleke, a bea banna sekhung ka molapong.
6Bakeni a ba botša a re: Lena efogang, le tšwe mo go Baamaleke, ke se tlo le fediša nabo; ka gobane lena le kile la dira Baisiraele ka moka ka botho mehla yela ba etšwa Egipita. Gomme Bakeni ba efoga, ba tšwa mo go Baamaleke.
7Saulo a bolaya Baamaleke go tloga Habila go fihla Suri go bataganego le Egipita.
8A swara Agaga kgoši ya Baamaleke a sa phela, a fediša setšhaba ka moka ka bogale bja marumo.
9Gomme Saulo le batho ba gagwe ba tsebafela Agaga; le dinku tše botse, le dikgomo tše botse, le tše di hlatlamago tšeo ka botse le ka go nona, ba se ke ba di dira digafiwamoka; ba gafa tše di bego di nyatšega e sego tša selo.
10Ke mo lentšu la Morena le tletšego Samuele la re:
11Ke šegame ka ge ke beile Saulo kgoši, ka gobane o ntlhanogetše, a se ke a phetha tše ke mmoditšego tšona. Ke mo Samuele a senyegilego pelo, a lala a bobolela Morena.
12A tsoga e sa le bošego gore a yo gahlana le Saulo ge go esa. Ba botša Samuele ba re: Saulo o tlile Karamele a itsemela sefoka sa phenyo; a feta a fologela Giligala.
13Samuele ge a mo hwetša, Saulo a mo rera a re: A Morena a go šegofatše! Ke phethile se Morena a se boletšego.
14Samuele a re: Diruiwa tše ke kwago di lla, le dikgomo tše ke kwago di bokola, ke tšang?
15Saulo a re: Ba di tšere go Baamaleke, ba tla natšo. Batho ba tsebafile le tše botse mo go dinku le dikgomo, gore e be didimo tša Morena Modimo wa gago. Tše dingwe tšona ba di gafile.
16Samuele a fetola a re: Homola, ke go botše tše Morena a mpoditšego tšona bošego bjo.
Saulo a re: Bolela!
17Samuele a re: A ga ke re mola o sa ipona bonyane, ke mo wa nago wa ba hlogo ya dilete tša Isiraele, wa tlotšwa ke Morena, wa ba kgoši ya Isiraele?
18Bjale Morena o be a go romile a re: Sepela o yo dira Baamaleke digafiwamoka, o lwe le dihlola tšeo, o be o di fediše.
19O be o reng ge o nyatša lentšu la Morena, wa kgouloga wa thopa, wa dira tše di befelago Morena?
20Saulo a fetola a re: Hleng ke phethile se Morena a se boletšego. Ke tšwile ka tsela ye a ntaetšego yona, ka tliša Agaga kgoši ya Amaleke; bona Baamaleke ka ba dira digafiwamoka.
21Ge e le batho, bona mo go dithebola ba hlaotše dinku le dikgomo tše di phadišago tšela tša go gafiwa, gore e be tša sedimo sa Morena Modimo wa gago ge re le mono Giligala.
22Samuele a re: A o re Morena o thabela dihlabelo le didimo go fetiša mola motho ge a ekwa se Morena a se boletšego? O tsebe gore go kwa go phala sedimo, go thaetša go phadiša mahura a dikgapa.
23Gobane go se kwe ke bobe boka boloi; bonganga bo etša go hlanoga le go yo laola. O lahlile lentšu la Morena; bjale le yena o go lahlile, gore o se ke wa hlwa o eba kgoši.
24Saulo a fetola a re: Ke sentše ka go se dire se Morena a se laetšego le se wena o se boletšego; gobane ke boifile batho, ka dira se bona ba bego ba se bolela.
25Bjale ako ntebalele sebe sa ka hle, o gome le nna ke yo rapela Morena.
26Samuele a re: Nka se ke ka goma le wena, ka gobane o lahla lentšu la Morena. Bjale le Morena o a go lahla, gore o se ke wa hlwa o eba kgoši ya Isiraele.
27Ya re ge Samuele a retologa a re ke a sepela, Saulo a swara ntlha ya kobo ya gagwe, gomme ya gagoga.
28Samuele a mo rera a re: Lehono Morena o gagotše bogoši bja Isiraele mo go wena, a bo neela wa geno e a go phalago.
29Moretwa wa Isiraele ga aketše, ga a thiše; gobane yena ga se motho e a kago thiša.
30Saulo a re: Ke sentše; fela, ako se ntlotlolle hle ge re bonwa ke bagolo ba setšhaba sa ka, ge re lebana le Baisiraele; o gome le nna, ke rapele Morena Modimo wa gago.
31Ya ba mo Samuele a boago a latela Saulo; gomme Saulo a rapela Morena.
32Samuele a tla a re: Tlišang Agaga kgoši ya Baamaleke fa go nna. Gomme Agaga a tla go yena a thabile a re: Ka kgonthe, go galaka ga lehu go ntlogile.
33Samuele a re: Lerumo la gago le be le amoga basadi bana. Bjale mosadi e a amogwago ngwana ka mokgwa woo ke mmago. Ke moka Samuele a kgabakela Agaga pele ga Morena ba le gona moo Giligala.
34Samuele a tsebo ikela a ya Rama; Saulo yena a rotogela ga gabo kua Gibea-Saulo.
35Gomme Samuele ga a ka a hlwa a bonana le Saulo, a ba a hwa; ka gobane Samuele o be a nyamile pelo ka baka la Saulo, ka ge Morena a šegamile ge a beile Saulo kgoši ya Isiraele.
Who We AreWhat We EelieveWhat We Do
2025 by iamachristian.org,Inc All rights reserved.
