DIPSALME 62 - Northern Sotho 1951/1986（NSO51）

Go ikhomolela le go letela ModimoYa mohlabeledi wa “Jeduthune”. Sefela sa Dafida.

1Moya wa ka o ikhomoletše o letetše Modimo fela, tlhakodišo ya ka e tšwa go yena.

2Lentšwe la ka ke yena fela, Mophološi wa ka, setšhabelo sa ka; nka se ke ka šutha gwa befa.

3Le tlo lesa neng go boka monna, la re le mo uše boka leboto le wago, bjaloka morako ge o kgerega?

4Ba rera fela go ka mo tekola moo a phagamilego; ba kgahlwa ke maaka. Ge melomo ya bona e šegofatša, ke ge dipelo di roga.

5A moya wa ka o ikhomolele o letetše Modimo fela, gobane ge ke holofetše, di tšwa go yena.

6Lentswe la ka ke yena fela, Mophološi wa ka, setšhabelo sa ka; nka se ke ka šutha.

7Go phološwa le go retwa di tlo ntlela di etšwa go yena. Lentswe la ka, maatla a ka, setšhabelo sa ka, di go yena Modimo.

8Felang le holofela yena, lena batho; tšhollang dipelo tša lena pele ga gagwe. Modimo ke yena setšhabelo sa rena.

9Bana ba batho e fo ba lefelafela; barwa ba batho ke maaka; ge ba ka lekwa o hwetša bohwefe bo feta bja lefela ka moka ga bona.

10Le se ke la holofela go thopa le go hlakola, la fo itira ba lefela. Ge thuo e ka le atela, a e se le tleme pelo.

11Go na le lentšu letee la Modimo nna ke le kwile gabedi, ge go thwe: Maatla ke a Modimo.

12Le botho ke bja gago, Mong wa rena, ge o bušetša motho se se lekanego ditiro tša gagwe.