1 KORONIKA 14 - Northern Sotho 1951/1986（NSO51）

Dafida o aga motse wa Jerusalema, o raka Bafilisita

1Hirama kgoši ya Tiro o romile batseta ba tla go Dafida, a iša diphata tša morokwana, le baagi, le babetli ba dikwata, ba mo agela ngwako.

2Dafida a lemoga gobane Morena o mmeile kgoši ya Isiraele, gobane mmušo wa gagwe o be o retwa gagolo ka baka la setšhaba sa gagwe sa Isiraele.

3Dafida a fela a tšea basadi ba bangwe gape a le motseng wa Jerusalema, a tswala barwa le barwedi.

4Maina a bao ba ba mo tswaletšwego Jerusalema šea: Ke Samua, le Sobaba, le Nathane, le Salomo,

5le Jibihara, le Elisana, le Elipelete,

6le Nogaha, le Nefege, le Jafia,

7le Elisama, le Beleyada, le Elifelete.

8Ya re ge Bafilisita ba ekwa gobane Dafida o beilwe kgoši ya Isiraele ka moka, ba tšwa ka moka ga bona ba re ba mo sware. Dafida a re go di kwa, a ba tšwela dira.

9Bafilisita ba rotoga ba enetša moedi wa Refaima.

10Dafida a botšiša Modimo a re: A ke tšwele Bafilisita dira? A o tlo ba gafela diatleng tša ka?

Morena a fetola a re: Tšwaa, ke tlo ba gafela diatleng tša gago.

11Ya re ge a rotogela Baala-Peratsima, Dafida a ba fenya ntshe; a bolela a re: Modimo o gogotše manaba a ka ka seatla sa ka bjalo ka meetse ge a gogola; mme felo fao ba re ke Baala-Peratsima.

12Bafilisita ba šia medimo ya bona gona moo; Dafida a re e fišwe ka mollo.

13Bafilisita ba boa ba enetša moedi woo.

14Dafida a buša a botšiša Modimo; Modimo a fetola a re: O se ke wa latelela; ba dike ka tletlolo, o ba fihlele ka sethokgweng sa Baka.

15E re ge o ekwa mošito mo dintlheng tša dihlare tša Baka, o ba šwahlele, gobane Modimo o tlo ba a tšwile a go etile pele go bolaya dira tša Bafilisita.

16Dafida a dira ka mo Morena a mo laetšego ka gona, a bolaya dira tša Bafilisita go tloga Gibeoni go fihla Gesere.

17Gomme tumo ya Dafida ya tšwela dinageng ka moka; Morena a dira gore ditšhaba ka moka di mmoife.