1Ka ngwaga wa bone wa kgoši Dario, ka letšatši la bone la kgwedi ya senyane ya Kisilefe, lentšu la Morena le tletše Sakaria.
2Ke ge ba Bethele ba romile Saretsere le Regemu Meleke le banna ba ba bego ba na nabo, ba tlile go loba Morena.
3Ba bolela le baperisita ba Ngwako wa Morena wa mašaba, le baporofeta, ba re: A re ka fela re iša pele go lla ka kgwedi ya bohlano, re ikona dijo ka mokgwa wo re šetšego re o dirile ka nywaga e mentši?
4Ke mo nna ke tletšwego ke lentšu la Morena, la re:
5Botša setšhaba sa naga ka moka le baperisita, o re: ge le feditše nywaga e masome a šupago le ikona dijo le itšhulafatša ka kgwedi ya bohlano le ka ya go šupa, a le be le ikona e le go direla nna?
6Ge le be le eja le enwa, a e be e se go itšela le go inwela?
7A ga se tšona ditaba tše Morena a bego a di bega ka baporofeta ba kgale mola Jerusalema go sa dutšwe go iketlilwe le dinakaneng tša gona, go sa agilwe le thoko ya borwa le molaleng?
8Lentšu la Morena la tlela Sakaria la re:
9Morena wa mašaba o re: Ahlolang ka moahlolelo wa therešo, le dirane ka botho le ka kgaugelo.
10Lesang go pateletša mohlologadi le tšhuana le mmotlana; motho a se ke a gopola wa gabo ka tše mpe.
11Fela, ba ganne go theetša, ba šatalatša melala, ba ithiba ditsebe, ba se ke ba kwa.
12Ba thatafiša dipelo tša bona boka magakabje, ba se kwe melao ya Morena wa mašaba le mantšu a gagwe, a a bego a a roma ka Moya wa gagwe le ka baporofeta ba kgale; ba ba ba welwa ke kgalefo e kgolo ya Morena wa mašaba.
13Bjalo ka ge ba ganne go kwa mola go bitša nna, bjale ge go bitša bona, nna ga ke kwe. O realo Morena wa mašaba.
14Ke ba tšitlantše le ditšhaba tšohle tše ba bego ba sa di tsebe; naga ya gabo ya šala e le marope, e se ne e a e sepelago le e a boelago mo go yona. Naga ye e rategago ba e dirile ya marope.
Who We AreWhat We EelieveWhat We Do
2025 by iamachristian.org,Inc All rights reserved.
