1Esera a sa rapela ka mokgwa wo a bobola a lla a itahletše fase pele ga ngwako wa Modimo a phuthegelwa ke phuthego e kgolokgolo ya Baiseraele, ya banna le basadi le bana; gobane sello setšhabeng e be e le se segolo.
2Sekanya morwa wa Jehiele wa ga Elama a bolela le Esera a re: Re hlanogetše Modimo wa rena ka go tšea basadi ba šele ba ditšhaba tša naga ye. Fela, kholofelo e sa le gona ya gore Baisiraele ba tšwe molatong wo.
3Go rata gore re dire kgwerano le Modimo wa rena, ya gore re gomiše basadi ba ka moka gotee le ba ba tswetšwego ke bona; e be go ya ka keletšo ya gago, Mong a ka, le ka keletšo ya ba ba tšhogilego ditaelo tša Modimo wa rena; mme go dirwe ka molao.
4Tsoga, gobane taba ye e na le wena; mme rena re tlo ema nago; tia maatla o dire!
5Ke moka Esera a tsoga, a eniša bagolo le baperisita le Balefi, le Isiraele ka moka, gore ba dire ka lentšu leo; mme ba ena.
6Gomme Esera a tsoga moo pele ga Ngwako wa Modimo, a ya phapošing ya Johanani morwa wa Eliyasiba; a tsena mme a se ke a ja bogobe, a se ke a nwa meetse, gobane a nyamile pelo ka baka la karogo ye ya ba ba boilego bothopša.
7Bjale ba hlaba mokgoši mo nageng ya Juda le Jerusalema, ba re ba ba boilego bothopša ba phuthegele Jerusalema ka moka ga bona.
8Ba re: Mang le mang e a sa tlego, e tlo re ge go fela matšatši a mararo a a bewago ke bagolo le bakgoma, go tlo tšwa thoto ya gagwe ka moka ya dirwa segafiwa, mme yena mong a kgaolwa mo phuthegong ya baboabothopša.
9Bajuda ka moka le Babenyamini ba phuthegela Jerusalema ka matšatši ao a mararo, ba tla ka la masome a mabedi la kgwedi ya senyane, mme setšhaba ka moka sa dula lepatlelong la Ngwako wa Modimo, sa thothomela ka baka la molato woo, le ka baka la go newa ke pula.
10Ke ge go ema Esera moperisita, a bolela le bona a re: Le arogile; le tšere basadi ba šele, mme ya ba go godiša molato wa Isiraele.
11Bjale ipoboleng molato wo go Morena Modimo wa botataweno, le dire se se mo kgahlago; le ikaroganye le ditšhaba tša naga ye le basadi bao ba šele.
12Setšhaba ka moka sa fetola, sa hlaboša mantšu sa re: Go lokile, go swanetše ge re dira se o se bolelago.
13Fela, setšhaba ke se segolo; mme ke lebaka la dipula di re šitišago go ema ntle; le gona ga se modiro wa letšatši letee le ge e le a mabedi; ka gobane dikarogo tšeo di atile mo go rena.
14A bagolo ba rena ba eme legatong la phuthego ka moka; gore bohle ba ba tšerego basadi ba šele metseng ya rena, ba tle ka mabaka ao a beilwego mme bagolo ba motse, gotee le baahlodi ba gona, ba fediše taba ye e re hlolelago kgalefo ya Modimo wa rena.
15Ba ba gannego taba ye e be e le Jonathane morwa wa Asaele, le Jehasia morwa wa Thikifa; ba tlatšwa ke Mesulama le Sabathai ba Balefi.
16Gomme baboabothopša ba dira ka mokgwa woo; moperisita Esera a hlaola banna ba bagolo ba meloko ka go ya ka dilete tša bona, ba bolelwa ka maina a bona; bona bao ba dulela taba ye ka tšatši la pele la kgwedi ya lesome.
17Mme ditaba tše tša banna ba ba bego ba tšere basadi ba šele, ba di feditše ka letšatši la pele la kgwedi ya pele.
18Mo go ba moloko wa baperisita go hweditšwe ba ba bego ba tšere basadi ba šele; mo go ba ga Jeshua morwa wa Jotsadaka le bana babo e be e le Maaseya, le Eliesere, le Jariba, le Gedalia.
19Bona ba ba itlema ka go fana diatla le ba bagolo, ba re ba tlo hlala basadi bao ba bona, ba ntšha kgapana ya seloba sa molato wa bona.
20Go ba ga Imere e be e le Hanani le Sebadia.
21Go ba ga Harima e be e le Maaseya, le Eliya, le Semaya, le Jehiele, le Uria.
22Go ba ga Pašuri e be e le Elioenai, le Maaseya, le Isimaele, le Nethaniele, le Josabadi, le Eleasa.
23Go Balefi e be e le Josabadi, le Simei, le Kelaya (ke Kelita), le Petaya, le Juda, le Eliesere.
24Go baopedi e be e le Eliyasiba. Go baletakgoro e be e le Salume, le Telema, le Uria.
25Go Baiseraele ba ga Pareose e be e le Ramia, le Jesiya, le Malakia, le Benaya.
26Go ba ga Elama e be e le Mathanya, le Sekaria, le Jehiele, le Abadi, le Jeremothe, le Eliya.
27Go ba ga Sathu e be e le Elioenai, le Eliyasiba, le Mathanya, le Jeremothe, le Sabadi, le Asisa.
28Go ba ga Bebai e be e le Johanani, le Hananya, le Sabai, le Athalai.
29Go ba ga Bani e be e le Mesulama, le Maluka, le Adaya le Jasuba, le Seale, le Jeramothe.
30Go ba Phahathe-Moaba e be e le Adini, le Kelale, le Benaya, le Maaseya, le Mathanya, le Betsaliele, la Binui, le Manase.
31Go ba ga Harima e be e le Eliesere, le Jisiya, le Malakiya, le Semaya, le Simeone,
32le Benyamini, le Maluka, le Semaria,
33Go ba ga Hasuma e be e le Mathanai, le mathathe, le Sabadi, le Elifelethe, le Jeremai, le Manase, le Simei.
34Go ba gaBani e be e le Maadai, le Amorama, le Uele,
35le Benaya, le Bedeya, le Keluhi,
36le Fanya, le Meremothe, le Eliyasiba,
37le Mathanya, le Mathanai, le Jasai,
38le Bani, le Binui, le Simei,
39le Selemia, le Nathane, le Odaya,
40le Makanadibai, le Sasai, le Sarai,
41le Asiriele, le Selemia, le Semaria,
42le Salume, le Amaria, le Josefa.
43Go ba ga Nebo e be e le Jeiele, le Mathithya, le Sabadai, le Sebina, le Jadai, le Joele, le Benaya.
44Ke bona bao ka moka ba ba bego ba tšere basadi ba šele; gomme mo go basadi bao ba bona ba bangwe ba be ba šetše ba belege bana.
Who We AreWhat We EelieveWhat We Do
2025 by iamachristian.org,Inc All rights reserved.
