DIPSALME 58 - Northern Sotho 1951/1986（NSO51）

Modimo e sa fela e le MoahlodiYa mohlabeledi, ka “Se senye”. Sefela sa Dafida.

1Hee lena ba thwe badimo! A le ahlola ka therešo? A le sekiša bana ba batho ka go ya ka go loka?

2Hleng le dira bokgopo ka boomo! Hleng diatla tša lena di dira tša bošoro mo nageng!

3Ba babe ke bakgelogi go tloga go tswalweng. Baaketši ba timela go tloga bjaneng.

4Bogale bja bona ke bohloko bja marabe, bo bjalo ka bja noga ya petla ya sefoa,

5e sa kwego lentšu la baupi, le ge e ka ba mokomemakgone.

6Modimo, pšhatla meno ao ka ganong ga bona; wena Morena, kgola meno a dibata tšeo.

7A ba fele boka meetse ge a nyomelela; e re ge ba nepa, mesebe e kgolege.

8A ba etše kgohu, ge e tšama e kopela, ba be bjalo ka lefolotšana, ba se bone seetša.

9Go thwe: Dipitša tša lena ga di kwe mollo wa meetlwa; ya moketla e tukuma le e swago.

10Baloki ba tlo thaba ge ba bona go lefetšwa, ba tlo gata madi a bakgopo ka dinao.

11Mme batho ba tlo re: Mabele go budule a moloki; anthe o gona Modimo molayalefase.