1Ge e le dineo tša Moya, bana bešo, ga ke rate ge le dula le sa di tsebe.
2Le a tseba, mola le sa le bantle, le be le gogelwa medimong e šele ya dimuma, ka mo le bego le išwa ka gona.
3Ke gona ke le botšago gore ga go motho yo e rego a na le Moya wa Modimo, a kago roga Jesu. Le gona ga go e a kago re: Jesu ke Mong wa ka, ge e se ka Moyamokgethwa.
4Dineo tša Moya di na le mehuta; Moya wona e fo ba o tee.
5Le mediro e na le mehuta; Moya wona e fo ba o tee.
6Le maatla a na le mehuta; Modimo yena e fo ba o tee e a dirago tšohle go bohle.
7E mongwe le e mongwe o fiwa se Moya o iponatšago ka sona, gore a hole ba bangwe ka sona.
8E mongwe o fiwa polelo e bohlale ke Moya. E mongwe o fiwa polelo ya tsebo ke wona Moya woo.
9E mongwe gape o fiwa tumelo a na le Moya woo; e mongwe o fiwa dineo tša go fodiša ka wona Moya woo.
10E mongwe o fiwa go kgona mehlolo; e mongwe o fiwa boporofeta; e mongwe o fiwa maleme a mehutahuta; e mongwe a tla a fiwa tlhathollo ya maleme ao.
11Gomme tšeo ka moka di dirwa ke wona Moya o tee woo, ge e mongwe le e mongwe o mo abela ka mo a ratago ka gona.
12Bjalo ka ge mmele e le o tee, ditho e le tše ntši, mme ditho tšeo tša mmele o tee woo, le ge e le tše ntši, di bopa mmele o tee, le yena Kriste o bjalo.
13Gobane ka moka ga rena re kolobeleditšwe go ba mmele o tee ka wona Moya o tee woo. E ka ba Bajuda, e ka ba Bagerika, e ka ba bahlanka, e ka ba bahunologi, ka moka re ba mmero o tee ka wona Moya.
14Gomme mmele ga se setho se tee fela, ke ditho tše ntši.
15Ge leoto le ka re: Nna ga ke letsogo; ga ke setho sa mmele, a le ka kgaogana le mmele?
16Ge tsebe e ka re: Nna ga ke leihlo, ga ke setho sa mmele, a e ka kgaogana le mmele?
17Ge mmele ka moka e ka fo ba leihlo fela, go kwa ga tsebe go ka tšwa kae? Ge mmele ka moka e ka fo ba tsebe fela, go dupa ga nko go ka tšwa kae?
18Ditho ka moka Modimo o di beile mmeleng, se sengwe le se sengwe a se bea madulong a sona, ka mo a ratilego ka gona.
19Gomme ge lebopo ka moka e ka be e le setho fela, mmele o ka be o le kae?
20Bjale gomme ditho ke tše ntši, mmele e le o tee.
21Leihlo ga le lahle letsogo, la re: Ga ke na taba nago! Le hlogo ga e lahle maoto ya re: Ga ke na taba le lena.
22Tabakgolo ke ge ditho tše e kego ke tšona tše botlana, ya ba tše mmele o phelago ka tšona.
23Tše eke tšona di nyatšegago mo mmeleng, re di apeša ka bothakga bjo bogolo; gomme tše e sego tše botše, re di apeša ka botšhepi bjo bogolo.
24Ge e le ditho tše di bonatla, ga di sa nyakelwa botšhepi. Modimo ge a hlatlaganya mmele, o ratile gore setho se botlana e be sona se godišwago.
25Gore mo mmeleng go se ke gwa ba le tšhitano, ditho di babalelane ka go kwana.
26Ge setho se tee se hlokofala, ditho ka moka di a hlokofala. Ge setho se tee se setšwa, ditho ka moka di thaba le sona.
27Bjale lena le mmele wa Kriste; ka moka le ditho mo le beilwego gona.
28Ba bangwe Modimo o ba beile phuthegong; a thoma ka go bea baapostola, ba bobedi ya ba baporofeta, ba boraro ya ba baruti; a iša pele go bea ba ditiro tše maatla, a bea ba dineo tša go fodiša, le bababaledi, le balaodi, le ba polelo tša mehutahuta.
29A ka moka ga bona e ka ba baapostola? A ka moka ga bona e ka ba baporofeta? A ka moka ga bona e ka ba baruti? A ka moka ga bona e ka ba ba ditiro tše maatla?
30A ka moka ga bona e ka ba ba ba dineo tša go fodiša? A ka moka ga bona e ka ba ba go bolela ka maleme? A ka moka ga bona e ka ba ba go hlatholla?
31Phegelelang dineo tše di phadišago tšeo, ke tle ke le bontšhe tsela e phalago dineo tšeo kgolekgole.
Who We AreWhat We EelieveWhat We Do
2025 by iamachristian.org,Inc All rights reserved.
