EKISODO 38 - Northern Sotho 1951/1986（NSO51）

Aletare ya dihlabelo, Legopo, Lapa, Badiri

1O dirile le aletare ya dihlabelo ka mamati a moduhlare. Botelele bja yona e be e le meelo e mehlano; le bophara bja yona e be e le meelo e mehlano; ya ba le dikhutlo tše nne. Boemo bja yona e be e le meelo e meraro.

2A e direla dinaka dikhutlong tše nne tša yona, ya ba tša mphiri o tee le wo o manegilego aletare ka moka.

3A dira le dibjana ka moka tša aletare, dipitša, le megopo, le meruswi, le ditlhaba, le meruswana ya magala. Dibjana tše ka moka o di dirile ka mphiri.

4A direla aletare selogwa sa mphiri se se etšago lokwa; sa ba ka tlase ga morumo o e potologilego, sa goma fase sa fihla mo gare ga lehlakore la aletare.

5A tšholla mekgoko e mene, ya dula mo dikhutlong tše nne tša lokwa la mphiri; ya ba ya go nokela diphata tša go rwala aletare.

6Diphata o betlile tša moduhlare, a di manega ka mphiri.

7Diphata tšeo a di tsenya mo mekgokong ya mo mahlakoreng a aletare, gore e be tša go e rwala. E dirilwe ka mamati, ka gare ya dula e le “holo”.

8A dira le legopo la mphiri; le leoto la lona a dira la mphiri. Mphiri wo e be e le wa diiponi tša basadi ba ba bego ba swere modiro mojakong wa Ngwako wa Kgwerano.

9Le lapa a le dira. Lešira la go šira thoko ya borwa ya ba la leokodi le le ohlilwego, le na le meelo e lekgolo.

10Gwa ba le dikokwane tše masome a mabedi tša go fega lešira leo. Di be di na le maoto a masome a mabedi a mphiri. Dikgwega tša mo dikokwaneng, le dikwabelo, e be e le tša silifera.

11Le lešela la go šira thoko ya leboa la ba le meelo e lekgolo. Gwa ba le dikokwane tša gona tše masome a mabedi tša maoto a mphiri a nago le masome a mabedi. Dikgwega le dikwabelo tša dikokwane e be e le tša silifera.

12Ka thoko ya Bodikela gwa ba le lešela la meelo e masome a fetšago seatla; dikokwane tša lona ya ba lesome. Dikgwega le dikwabelo tša tšona e be e le tša silifera.

13Mašela a go šira ka thoko ya bodikela e be e le meelo e masome a mahlano;

14la ka thoko e ngwe ya sefero e be e le meelo e lesome le le metšo e mehlano; dikokwane tša lona e be e le tše tharo, di na le maoto a tšona.

15Thoko e nngwe ya sefero le yona e be e širwa ka lešela la meelo e lesome le metšo e mehlano; gwa širwa thoko tšohle tša sefero. Dikokwane tša gona e be e le tše tharo le maoto a tšona.

16Mašela ka moka a go šira lapa thoko tšohle e be e le a leokodi le le ohlilwego.

17Maoto a dikokwane e be e le a mphiri; dikgwega le dikwabelo tša dikokwane e be e le tša silifera. Dimanego tša dihlogo tša tšona, le dikwabelo tša tšona dikokwane ka moka tša lapa e be e le tša silifera.

18Lešira la sefero le be le logilwe la ba le mabalabala a purapura e tala le e khubedu, le moretele, le leokodi le le ohlilwego. Botelele bja lona e be e le meelo e masome a mabedi. Bophara bja lona go tšwa tlase go ya godimo e be e le meelo e mehlano; bja lekana le bja mašira a lapa.

19Gwa ba le dikokwane tše nne tša gona, tša maoto a mane a tšona a mphiri. Dikgwega tša tšona e be e le silifera; dimanego tša dihlogo tša tšona e be e le silifera, le dikwabelo tša tšona.

20Dimapolo ka moka tša Ngwako, le tša lapa thoko tšohle, e be e le tša mphiri.

21Dipalo šedi tša dikago tša Ngwako, Ngwako wa Melao. Di badilwe ke Ithamara morwa wa Arone moperisita, a dirišwa ke Balefi, ba laeditšwe ke Moshe.

22Ge e le Betsaliele morwa wa Uri morwa wa Huri wa moloko wa Juda, yena e be e le wa go dira tšohle tše Morena a di laetšego Moshe,

23a na le Oholiaba morwa wa Ahisama wa moloko wa Dani, moseti le mologimakgone, mologasetšhepi ka purapura e tala le e khubedu le moretele, le leokodi.

24Bjale gauta ka moka ye e feletšego medirong ya sekgethwa ka moka, ye e bego e le gauta ya motšhelo, e be e le talente tše masome a mabedi le metšo e senyane, le sekele tše makgolo a šupago a nago le masome a mararo, ge go iwa ka sekele ya sekgethwa (ke diponto tše 167 392).

25Silifera ya go tšwa ge go balwa ba phuthego, e be e le ditalente tše lekgolo, le sekele tše sekete le makgolo a šupago a nago le masome a šupago le metšo e mehlano, ge go iwa ka sekele ya sekgethwa (ke diponto tše 42 500).

26Ka o tee ba ntšhitše beka, ke seripa sa sekele ya sekgethwa. E ntšhitšwe ke ba ba kgethetšwego go balwa, ba nywaga e masome a mabedi le go fetiša, e be e le batho ba dikete tše makgolo a selelago le dikete tše tharo, tše di nago le makgolo a mahlano, le masome a mahlano.

27Talente tše lekgolo tša silifera di dirile maoto a sekgethwa, le maoto a lešira. Maoto a lekgolo a dirwa ka ditalente tše lekgolo; leoto la tšea talente e tee.

28'Sekele tše sekete se se nago le makgolo a šupago le masome a šupago le metšo e mehlano, di dirile dikgwega tša mo dikokwaneng, tša manega dihlogo tša tšona, tša dira dikwabelo.

29Mphiri wa seekaro e be e le ditalente tše masome a šupago le sekele tše dikete tše pedi tše di nago le makgolo a mane.

30Mphiri wo o dirile maoto a mo mojakong wa Ngwako wa kgwerano, le aletare ya mphiri, le selogwa sa yona sa mphiri, le dibjana ka moka tša aletare yeo;

31o dirile le maoto a mo lapeng thoko tšohle, le maoto a mo seferong sa lapa, le dimapolo ka moka tša Ngwako, le dimapolo ka moka tša mathokong ka moka a lapa.