1Bana bešo! Se pelo ya ka e se llelago, se ke ba kgopelelago sona go Modimo, ke gore bona Baisiraele ba phološwe.
2Gobane nna nka ba hlatsela ka re ba fišegetšwe Modimo; fela, ba hloka temogo.
3Ba ganne go bušwa ke toko ya Modimo, ka ge toko yeo ya Modimo ba sa e tsebe, ka go rata go ipeela toko ya bona ka noši.
4Gobane Kriste ke yena phetšo ya Molao, gore toko e be ya bohle ba ba dumelago.
5Moshe yena o ngwadile tša toko e tlago ka Molao, ye e rego: ge motho a dira ka mo o bolelago, a phela ka wona.
6Ge e le toko e tlago ka tumelo e re: Se bolele pelong ya gago wa re: Legodimong go tlo rotogela mang, e ka ba go re: a yo fološa Kriste;
7se bolele wa re: Moleteng go tlo fologela mang, e ka ba go re: a yo rotoša Kriste bahung.
8Toko e tlo reng? E tlo re: Lentšu le le fa kgauswi le wena, le fa molomong wa gago, le mo pelong ya gago. Ke lona lentšu la tumelo, le rena re le kwatšago.
9Gobane ge o ipolela ka molomo wa re: Jesu ke yena Morena, wa realo o dumela ka pelo gore Modimo o mo tsošitše bahung, gona o tlo phološwa.
10Gobane motho o dumela ka pelo a tsebo lokafala; o ipolela ka molomo a tsebo phološwa.
11Hleng lengwalo le re: E a dumelago a ka se lešwe dihlong.
12Ga go hlaolwe Mojuda goba Mogerika. Morena wa bohle ke o tee, e a humilego wa go kgona go nea bohle ba ba mmitšago.
13Gobane go thwe: Ba go tlo phološwa ke ba ba bitšago ina la Morena.
14Gomme bjale ba tlo bitša bjang ge ba sešo ba mo dumela? Ba tlo dumela bjang ge ba sešo ba mo kwa? Ba tlo kwa bjang, ge go se segoeledi?
15Gomme ba ka goelela bjang ge ba sa rongwe? Ke tšona tše di ngwadilwego gwa thwe: A ratega bjang maoto a motseta wa ditaba tše botse!
16Fela, ba go kwa ditaba tše botse e be e se bohle. Le Jesaya o re: Ke mang a dumetšego taba tše re di begago?
17Etse tumelo e tšwa go kweng; mme go kwa go tla ka lentšu la Modimo.
18Bjale ke re: A ga ba ešo ba le kwa? Ba le kwele. Kgowane ya tšona e tšwetše lefase ka moka, le kua mafelelong a lona go kwala polelo ya tšona.
19Gomme ke re: A Baisiraele ga ba di tsebe? Moshe o thomile go di bolela a re: A nke le nna ke ba rumole ka se e sego setšhaba, ke ba hlohle ka setšhaba sa bošilo.
20Jesaya a tla a beta pelo a re: Ba ba bego ba sa nnyake, ke re a ba nkhwetše; setšhaba se se bego se sa rapele ina la ka, ke bolela naso ke re; Ke nna e!
21A tla a bolela Isiraele a re: Ke hlwile ke emiša atla tša ka ka baka la setšhaba sa dinganga sa go ya ka maithatelo.
Who We AreWhat We EelieveWhat We Do
2025 by iamachristian.org,Inc All rights reserved.
