DIEMA 16 - Northern Sotho 1951/1986（NSO51）

Diema tša Salomo

1Sa pelo ya motho ke go loga maano; ge e le phetolo ya leleme e tšwa go Morena.

2Motho, tsela tšohle tšagwe o re di lokile, ge e le Morena, o šetša tša pelong.

3Gafela Morena mediro ya gago ka moka; ke mo merero yago e tlo go phethega.

4Dilo tšohle di ne se Morena a di bopetšego sona; le yo mobe o mmopetše tšatši la dikotsi.

5Morena o nyenya baipoti bohle. Kgang še: Nna ke re: Ba ka se hloke kotlo.

6Molato o fedišwa ka botho le therešo; dibe motho o di lahla ka go boifa Morena.

7Ge tsela tša monna di kgahla Morena, o tlo ba a mmoelanya le manaba agwe.

8Leruonyana la go ntlela ka go loka, le phala le legolo la go tla ka tselakgopo.

9Pelo ya motho e akanya boyo; nao tšona a di bušwe ke Morena.

10Lentšu la kgoši e ke ke la Modimo, gore a se foše kahlolong.

11Kelo le theko ya ruri ke tša Morena; meelo yohle ya boima ke tiro ya gagwe.

12Dikgoši di nyenya ditiro tše kgopo; bodulakgoši bo thekgwa ke toko.

13Melomo e bolo e kgahla dikgoši; di rata mmoledi wa tša go loka.

14Kgalefo ya kgoši ke masebalehu; monna yo bohlale o a e phohliša.

15Mahlomašweu a kgoši a a phediša; botho bja yona bo ka leru la tsheola.

16Go huma bohlale go phala tshipi e khwibidu; go huma tlhaloganyo go phala tshipi e tshehla.

17Mmila wa baloki ke wa go ila bobe; molotolatsela o diša phelo bja gagwe.

18Mafadi a latelwa ke thobego; go wa go etelwe pele ke boipoti.

19Go ipoetša le babotla go phala ge o abaganya dithebola le baikgodiši.

20Mosetšafoko o tlo huma; potaMorena o na le mahlatse.

21Mohlale, re ra wa pelo e bohlale, bose bja puo bo kgobela thuto.

22Tlhalefo, monga yona o ne diba sa bophelo; thuto ya mašilo ke bošilo.

23Pelo ya mohlale e ruta leleme la gagwe; e atiša thuto molomong wa gagwe.

24Polelo tše di rategago ke todi ya dinose; di natefela pelo, le mmele di a tsoša.

25Go na le tsela, ye batho ba rego ke tsela, anthe e wetša ditseleng tša lehu.

26Pelo ya modiri e direla monga yona; e gapeletšwa ke mogolo.

27Sehlola se epolla bobe; ganong ga sona go etša mollo o tukago.

28Monnamoradia o lohlanya batho; wa ditshele o amolla le bagwera ba bohloko.

29Monna o šoro o goka wa gabo; o mo iša mo tseleng e sego botse.

30Maponyaponye o na le bomenemene; sepetlamelomo o phethile bošaedi.

31Hlogopududu ke ala sa botšhephi; se hwetšwa tseleng ya go loka.

32Mokgotleledi o phala mogale; mohulamotse o phalwa ke mofenyapeloyagwe.

33Tengwa le lengwa atleng; phetšo ya ditaba e tšwa go Morena.