1Mmušo wa magodimo o swana le motho e lego mong wa ngwako, e a tšwilego e sa le bosasa go yo thwalela tšhemo ya gagwe badiri.
2A kwana le badiri gore ka tšatši e tlo ba šeleng, a ba roma ba ya tšhemong ya gagwe.
3A tšwa gape ka nako ya boraro, a hwetša ba bangwe ba eme lepatlelong ba se na modiro.
4A bolela le bona a re: Le lena yang tšhemong ya ka; ke tlo le nea se se swanetšego. -- Le bona ba ya.
5A tšwa gape ka nako ya go selela, le ka ya senyane, a dira ka mokgwa woo.
6Ge a etšwa ka nako ya lesome le motšo o tee, a bona ba bangwe ba eme ba se na modiro; a bolela le bona a re: Le reng le ehlwa le eme fela letšatši ka moka?
7Ba fetola ba re: Ke ka gobane ga ra thwalwa ke motho. Yena a re: Le lena yang tšhemong ya ka; le tlo tšea se se le swanetšego.
8E šetše e le mantšiboa, mong wa tšhemo a botša molaki wa gagwe a re: Bitša badiri, o ba nee moputso wa bona; o thome ka ba morago, o fetše ka ba pele.
9Gwa tla ba go thwalwa ka nako ya lesome le motšo o tee, ka moka ba newa šeleng-šeleng.
10Ge go fihla ba pele, ba re re tlo tšea se se fetišago; fela, le bona ba tšea šeleng-šeleng.
11Ge ba fiwa yona, ba galalela mong wa ngwako ba re:
12Bao ba morago ba dirile nako e tee fela, mme o ba lekantše le rena ba re rwelego boima bja letšatši ka moka le go fiša ga lona.
13Mong wa ngwako a fetola a bolela le e mongwe wa bona a re: Wena mogweraka! Ga ke go pate. A ga wa ka wa kwana le nna ka šeleng?
14Tšea se e lego sa gago o sepele; ge e le nna, yo wa morago ke rata go mo nea se se lekanago le sa gago.
15Afa ga go a ntshwanela ge ka tše e lego tša ka ke dira ka mo ke ratago? O nkgatholela mahlo ka gobane ke le yo botho?
16Go tlo ba bjalo: Ba morago e tlo ba ba pele; mme ba pele e tlo ba ba morago. Gobane ba ba biditšwego ke ba bantši; fela ba ba kgethilwego ga ba nene.
17Mohla a le tseleng a rotogela Jerusalema, a bitša barutiwa ba gagwe ba lesome le metšo e mebedi, a ya thoko mo go sego batho, a bolela le bona a re:
18Bjale re rotogela Jerusalema; mme Morwamotho o tlo gafelwa baperisita ba bagolo le bamangwalo, mme ba tlo mo ahlolela polao.
19Ba tlo mo gafela diatleng tša bantle, gore a kwerwe, a otliwe, a bapolwe sefapanong; fela, ka tšatši la boraro o tlo tsoga.
20Ka lebaka leo go kile gwa tla mmago barwa ba Tsebedeo, a na le barwa ba gagwe, a mo khunamela a na le se a ratago go se kgopela.
21Jesu a re: O ratang?
Yena a re: A nke o re barwa ba ka ba babedi ba mmušong wa gago e mongwe a dule ka go le letona la gago, e mongwe a dule go la ntšogošo.
22Jesu a fetola a re: Ga le tsebe se le se kgopelago. A le ka kgona go nwa senwelo se ke yago go se nwa, le ge e ka ba go kolobetšwa ka kolobetšo ye ke kolobetšwago ka yona?
Bona ba re: Re ka kgona.
23Jesu a re: Senwelo sa ka le tlo se nwa; le kolobetšo ye ke kolobetšwago ka yona, le tlo kolobetšwa ka yona; ge e le go dula ka mo letsogong la ka le letona le go la ntsogošo, ga se mo motho a kago newa ke nna; go tlo newa bao ba go lokišeditšwego ke Tate.
24Ya re ge ba lesome ba di kwa, ba ba hlonamela ka kudu, banna bao le mosadi yoo.
25Jesu a ba bitša bohle a re: Le a tseba; marena a ditšhaba sa bona ke go buša, mme sa ba bagolo ke go dira batho ka maatla.
26Go lena go se ke kwa ba bjalo. E a ratago go ba e mogolo mo go lena, a a be modiredi wa lena.
27Le e a ratago go ba wa pele mo go lena, a a be mohlanka wa lena;
28A etše Morwamotho e a sa kago a tlela go direlwa, a tlile go direla, le go neela bophelo bja gagwe gore e be topollo ya ba bantši.
29Ya re ge a etšwa motseng wa Jeriko, a latelwa ke lešaba le lentši.
30Ba bona batho ba babedi ba difofu ba dutše hleng ga tsela. Bona bao ge ba ekwa gore ke Jesu e a fetago, ba goeletša ba re: Re gaogele, Morena Morwa wa Dafida!
31Lešaba la ba kgalema la re ba homole; bona gomme ya ba gona ba hlabošago mantšu ba re: Re gaogele, Morena Morwa wa Dafida!
32Jesu a ema, a ba bitša, a re: Le rata ge nka le direlang?
33Bona ba re: Morena, a mahlo a rena a budollwe!
34Jesu a ba šokelwa, a kgwatha mahlo a bona, ba napa ba bona e sa le semeetseng; mme ba mo latela.
Who We AreWhat We EelieveWhat We Do
2025 by iamachristian.org,Inc All rights reserved.
