DIPSALME 108 - Northern Sotho 1951/1986（NSO51）

Kholofelo ya ba ba fentšwegoKopelo, sefela sa Dafida.

1Modimo, ke tlemile pelo, mme ke a opela; ke hlaba sefela; le moya wa ka o realo.

2Hee seletšo sa ka, wena lekope! A nke ke tsoše le mahuba!

3Ke go leboge, Morena, ke le gare ga ditšhaba; ke hlaba sefela sa gago ke le gare ga dilete.

4Gobane botho bja gago bo feta magodimo ka bogolo, therešo ya gago e goma ka leratadima.

5Modimo, phagama godimo ga magodimo; mme leina la gago le ukamele lefase lohle.

6Gore baratwa ba gago ba phele, mme seatla sa gago se maatla se phološe, o kwe ge re kgopela.

7Modimo o boletše a le Sekgethweng sa gagwe, mme ke hlalalela ge a itše: Ke arola la Sikeme; ke ela moedi wa Sukhothe;

8La Gileada ke la ka; le la Manase ke la ka; la Efuraimi ke kuane ya ka; mme Juda ke lehlotlo la ka la bogoši.

9La Moaba ke sehlapelo sa ka; la Edomo ke la go akgela eta sa ka; mme la Filisita ke tla le goloka.

10Ke mang a kago nkiša motseng o tiilego? Ke mang wa go mphihliša kua Edomo?

11A ga se wena Modimo, e o re lahlilego, o sa kago wa tšwa dira le rena?

12Re lwele, ge re hlabana le manaba; gobane phološo ya batho ke ya lefela.

13Ka Modimo re tlo dira matla; ke yena a tlogo gatakela manaba a rena.