HESEKIELE 3 - Northern Sotho 1951/1986（NSO51）

Hesekiele o hlathollelwa se e lego modiro wa gagwe

1A bolela le nna a re: Ngwanamotho, jaa se o se bonago se; jaa letlakala le la lengwalo, o kgone go yo bolela le moloko wa Isiraele.

2Ka napa ka ahlama, a nteša letlakala leo.

3A bolela le nna a re: Ngwana motho, metša lengwalo leo ke go neilego lona, le go tlale ka teng. Nna ka le ja, ka kwa le le bose boka nose ka ganong.

4Ya ba gona a rego: Ngwana motho! Sepela o ye go ba moloko wa Isiraele, o ba botše mantšu a ka.

5Gobane ga o rongwe go setšhaba sa mmolelo wo o sa kwalego sa leleme le lethata. O rongwa go moloko wa Isiraele.

6Ga o rongwe go ditšhaba tše ntši tša mebolelo ye e sa kwegego tša maleme a mathata, tše o sa di kwego ge di bolela. Fela, ge nka be ke go roma go tšona, tšona di ka be di go kwa.

7Ge e le ba moloko wa Isiraele, bona ga ba rate go kwa; gobane ga ba rate go kwa se nna ke se bolelago. Ba moloko wa Isiraele bohle ke ba phatla e thata le ba pelo e reteletšego.

8Fela, le sa gago sefahlogo ke se thatafatša bjalo ka tša bona; le ya gago phatla ke e thatafatša ya etša tša bona.

9Le ya gago phatla ke e nea bothata bja talama le bja legakabje. O se ba boife, o se tšhoge difahlego tša bona ge e le moloko wa dinganga.

10A buša a re: Ngwana motho, mantšu ka moka a ke go botšago ona, a bee pelong o a kwele ka ditšebe.

11O tsebo ya go ba ba thopilwego ba setšhaba sa ka, o bolele ka go re: Morena Mong a bohle o re: O realo ge ba ka theetša le ge ba ka gana.

12Ke mo moya wa nago wa nkuka, ka kwa modumo ka kua nthago ga ka, e le legoa le legolo, go thwe: A go retwe letago la Morena madulong a lona!

13Gwa kwala diphego tša diphedi tšela di tiana, le modumo wa maotwana ala a a bapetšego natšo, gotee le modumo wa legoa leo.

14Moya ge o nkiša o tloga le nna, ka ya ke befetšwe, ke tletšwe ke pelo; gomme seatla sa Morena se be se ntshwere thata.

15Ka fihla go mathopša a Theleabiba, a a bego a agile nokeng ya Kebara; ka dula le ba ba agilego moo; ka fetša matšatši a a šupago ke ikhomoletše, ke le mo go bona.

16Ge go fetile matšatši ona ao a šupago ka tlelwa ke lentšu la Morena la re:

17Ngwana motho! Ke go beile mohlapetši wa ba moloko wa Isiraele. O tlo kwa se molomo wa ka o se bolelago; a tlo ba eletša o romilwe ke nna.

18Ge ke bolela ke era mosenyi ka re: O tlo hwa mme wena o se mo eletše, wa lesa go bolela nae wa go mo lahliša tsela e mpe ya gagwe gore a phele, -- mosenyi eo ge a tlo hwela bobeng bja gagwe, madi a gagwe ke tlo a lata seatleng sa gago.

19Fela, ge mosenyi o mo eletša, mme yena a se lahle bobe bja gagwe, a se lese tsela e mpe ya gagwe, -- ge yena a hwela bobeng bja gagwe, wena o tlo tšwa o iphološitše.

20Le gona, ge moloki a ka lahla toko a dira bokgopo, ke tlo mmeela sekgopi a hwa. Ge o sa mo eletše, a hwela dibeng tša gagwe, gwa se hlwe go tsebja tše di lokilego tšela a di dirilego, gona madi a gagwe ke tlo a lata seatleng sa gago.

21Fela, ge moloki eo o ka mo eletša wa re a lese go dira dibe, mme a lesa go di dira, o tlo phela ka ge a eletšegile, le wena wa tlo o iphološitše.

22Seatla sa Morena sa ntlela ke le moo, mme a re: Tsoga o tšwele molaleng, ke bolele nago.

23Ka tsoga ka tšwela molaleng, ka bona letago la Morena le eme gona moo, e le lona lela ka go le bona nokeng ya Kebara. Mme ka khunama ka lotšha.

24Moya wa ntlela wa nkemiša ka maoto, wa bolela le nna wa re: Sepela o yo ikgonyeletša ka ngwakong wa gago.

25Wene ngwana motho, o tsebe gore o tlo tlengwa ka dithala, wa se ke wa tšwela go bona.

26Leleme la gago ke tlo le gomaretša magalapeng, o tle o be semuma, wa se hlwe o eba mokgalemi wa bona, gobane ke moloko wa dinganga.

27E tlo re ge ke bolela nago, ke mo ke tlogo go bula molomo, wa tlo bolela le bona wa re: Morena Mong a bohle o re! Wa go kwa o tlo kwa. Wa go gana o tlo gana; ka gobane ke moloko wa dinganga.