1Motseta wa phuthego ya Efeso mo ngwalele o re:
Go bolela e a swerego naledi tše šupago ka seatla sagwe, e a sepelago gare ga dihlomapone tše šupago tša gauta.
2O re: Mediro ya gago ke a e tseba, le go itapiša ga gago, le go kgotlelela ga gago, le gore ba babe o šitilwe go agišana nabo, mme bao ba rego re Baapostola, mola e se bona, o ba lekotše wa hwetša e le ba maaka.
3O a kgotlelela, o rwele bothata ka baka la leina la ka, gomme ga o lape.
4Se ke se solago go wena, ke ge lerato la gago la pele o le lahlile?
5Bjale gopola mo o wetšego fase, o sekologe o boele medirong yela ya pele. Ge o sa dire bjalo, ke tlo tsoga ka go tlela, ka kgorometša sehlomapone sa gago, ka se tloša madulong a sona, ge o sa sokologe.
6Fela, se o nago naso sese: O hloile mediro ya Banikolaite, ye le nna ke e hloilego.
7E a nago le tsebe a a kwe se Moya o se botšago diphuthego.
E a fenyago ke tlo mo nea a ja sehlare sa bophelo se se lego Paradiseng ya Modimo.
8Motseta wa phuthego ya Simirina mo ngwalele o re:
Go bolela Wamathomo le Wamafelo, e a kilego a hwa, mme a phela,
9O re: Tlaišego ya gago ke a e tseba, le bodiitšana bja gago. Fela, o mohumi. Ke tseba maroga a bao ba rego re Bajuda mola e se bona, e le phuthego ya Sathane.
10Se boife tše o tlogo hlokofatšwa ka tšona; o tsebe gore diabolo o tlo lahlela ba bangwe ba lena kgolegong gore le lekwe; gomme le tlo ba le ditlaišego ka matšatši a lesome. Botega go fihla lehung, ke tle ke go nee mphapahlogo wa bophelo.
11E a nago le tsebe a a kwe se Moya o se botšago diphuthego.
E a fenyago a ka se ke a ba a hlokofatšwa ke lehu la bobedi.
12Motseta wa phuthego ya Peregamo mo ngwalele o re:
Go bolela e a nago le lerumo le le bogale lelootšwagobedi.
13O re: Mo o agilego gona ke a go tseba; ke mo go lego sedulo sa bogoši sa Sathane. Mme leina la ka o le gomaretše wa tiiša, wa se latole tumelo le mehleng yeo ya ge Antipa hlatse yeo ya go mpotegela a bolawa moo go lena moo Sathane a agilego gona.
14Fela, go sa na le tše di sego nene tše ke di solago go wena; ke ge moo o sa na le ba ba gomaretšego thuto ya Bileama ye a e rutilego Balaka, a re a ree Baisiraele, ba tle ba je didimo ba dire bootswa.
15Le gona o sa na le ba ba gomarelago thuto ya Banikolaite ka mokgwa woo.
16Sokologa, gore ke se tlo go tlela ka pela ka lwa le batho bao ka lerumo la molomo wa ka.
17E a nago le tsebe a a kwe se Moya o se botšago diphuthego.
E a fenyago ke tlo mo nea a ja Mana ye e utilwego, ke tlo mo fa talama e tšhweu ye e tlokiwego ina le lefsa le le sa tsebjego ke e mongwe, ge e se yena e a le newago.
18Motseta wa phuthego ya Thiathira mo ngwalele o re:
Go bolela Morwa wa Modimo wa mahlo a swanago le kgabo ya mollo, wa maoto a go swana le tshipi ye e tagilego.
19O re: Mediro ya gago ke a e tseba, le lerato la gago, le ge o hlankela ba bangwe, le kgotlelelo ya gago, le gore mediro ya gago ya bjale e phala ya kgale.
20Se ke se solago mo go wena ke ge o lesa mosadi yola Isebele e a rego ke moporofeta a ruta a fora bahlanka ba ka, a re ba dire bootswa ba je didimo.
21Ke sa mo file sebaka sa gore a sokologe a lahle bootswa bja gagwe; fela, o sa gana go sokologa.
22Tseba gore ke tlo mo lahlela dilaong; le bao ba go otswa le yena ke tlo ba lahlela tlhokofatšong e kgolo ge ba sa sokologe ba lahla mediro yeo ya gagwe.
23Bana ba gagwe ke tlo ba iša lehung la ruri; mme diphuthego ka moka di tlo tseba ge e le nna Molekolapshiolepelo. Gomme mang le mang wa lena ke tlo mo nea se se lebanego mediro ya lena.
24Ge e le lena, ba bangwe ba Thiathira, ba e sego ba thuto yeo, ba ba sešogo ba tseba tšeo ba rego ke madiba a Sathane, bona ke re nka se ke ka ba rweša morwalo o mongwe.
25Fela, le dule le swere se le nago le sona, ke be ke fihle.
26E a fenyago a lota mediro ya ka go fihla bofelong, ke tlo mo fa maatla a go buša ditšhaba,
27O tlo di diša ka molamo wa tshipi, o tlo di phuma wa pitša tša letsopa, bjalo ka ge nna ke filwe tšeo ke Tate.
28Le gona ke tlo mo fa naledi ya meso.
29E a nago le tsebe a a kwe se Moya o se botšago diphuthego.
Who We AreWhat We EelieveWhat We Do
2025 by iamachristian.org,Inc All rights reserved.
