1Hee lena Baloki, hlalalelang Morena! Direto di ratega go bailadibe.
2Lebogang Morena ka diletšo, le mo opelele ka metato e lesome.
3Mo hlabeleng sefela se sefsa, letšang makope le gobe megobo.
4Gobane lentšu la Morena ke therešo; mediro ya gagwe ka moka ke ya go botega.
5O rata toko; o rata molao; lefase le tletše botho bja Morena.
6Magodimo a dirilwe ka lentšu la Morena; makoko ka moka a ona a dirilwe ka moya wa molomo wagwe.
7O kgobetše meetse a lewatle boka mmoto; madiba o ipoloketše ona.
8Lefase ka moka a le boife Morena. Baagi bohle ba legohle a ba šie yena.
9Gobane o boletše, tša ba gona: o laile, tša rotoga.
10Morena o raranya maano a bantle, o phekgola megopolo ya ditšhaba.
11Mme morero wa Morena o tiile neng le neng; kgopolo tša pelo ya gagwe di eme go ya go ile.
12Setšhaba sa lehlogonolo ke se Morena e lego Modimo wa sona, se a ikgethetšego sona ya ba leruo la gagwe.
13Morena o okama a le kua legodimong, o bona bana ba batho ka moka.
14A le gona kua mošate, o šetša bohle ba go dula mo lefaseng.
15Yena mmopi wa dipelo ka moka tša bona, ke yena tlhokomedi ya mediro ya bona ka moka!
16Ga go kgoši e fenyago ka bontši bja madira, le monna ga a kgone ka go ba le maatla a magolo.
17Le pitsi ga e thuše selo go fenyeng; maatla a magolo a yona ga a phološe.
18Tsebang gore leihlo la Morena le bona ba ba mmoifago, ba ba letetšego kgaugelo ya gagwe,
19Gore a phološe meoya ya bona lehung, a ba phediše tlaleng.
20Dipelo tša rena di leta morena; Mohlakodiši le kotse ya rena ke yena.
21Dipelo tša rena di thabetše yena; gomme leina le lekgethwa lagwe re botile lona.
22Morena, a re okamelwe ke botho bja gago, bjalo ka ge rena re go holofetše.
Who We AreWhat We EelieveWhat We Do
2025 by iamachristian.org,Inc All rights reserved.
