DIPSALME 98 - Northern Sotho 1951/1986（NSO51）

Sereto sa Modimo MophološiSefela.

1Hlabelang Morena sefela se sefsa, gobane o dira mehlolo. Seatla sa gagwe sa le letona, letsogo la gagwe le lekgethwa, di mo diriša phološo.

2Morena o kwatša phološo ya gagwe, go loka ga gagwe o go utollela-baditšhaba.

3O gopotše kgaugelo yagwe le therešo yagwe ka go setša leloko la Isiraele; magomo ohle a lefase a bona ge go phološa Modimo wa rena.

4Wena lefase lohle, gobela Morena mogobo; hlagišang mekgolokwane le mminele koša.

5Hlabang sefela sa Morena ka diletšo, ka diletšo le ka mantšu a sereto,

6Ka dinaka le ka phalafala; e be gona go hlalala pele ga Morena, yena e lego kgoši.

7Lewatle a le dume le tše tletšego mo go lona, le legohle a le dume le na le baagi balo!

8Dinoka di ope magoswi, gotee le dithaba ge di goloka

9pele ga Morena, gobane o tla go ahlola lefase. O tlo ahlola legohle ka toko; o tlo ahlola ditšhaba a sa bebe motho.