JOBO 5 - Northern Sotho 1951/1986（NSO51）

Elifase o re: Go šegofatšwa e a ikokobetšago

1Gweletša! Wa go araba o gona naa? -- Mokgethwa ke ofe yo o tlo go lebana nae?

2Lešilo le bolawa ke sebete; setlatla se hwa ka lehufa.

3Ke bone lešilo le namile medu; ka tloga ke roga marope a lona.

4Bana ba lona ba kgole le monamoledi; ba kataketšwe mo kgorong, go se na molwedi.

5Mabele a bona a llwe ke ba tlala; ba a ntšha gare ga magora; matlotlo a bona a meditšwe ke ba nyorilwego.

6Gobane madimabe ga a mele fase; mahlomola ga a hloge a etšwa mobung;

7ke motho e a tswaletšwego mahlomola; o etša dihlase ge di tsoga le kgabo tša fofa.

8Ge e ka be e le nna, fo iša mogopolo go Modimo; taba ya ka nka be ke e digela yena Modimo,

9yena Modiri wa tše kgolo di sa latišegego, yena wa matete a a sa balwego.

10Yena a romago pula, ya tla mo faseng, a tšhollela meetse melaleng;

11ya ba go phagamiša babotlana; ba ba nyamilego, ya ba go ba tsoša ba phologa.

12Merero ya ba maano o a e senya, diatla tša bona di se sa kgona selo.

13Ba mahlale o ba tanya ka a bona maano, baipoti ba iphereketša ka mamenemene.

14Ba gahlana le leswiswi mola go šetše go sile; ba phapharega wa bošego mola e le mosegare.

15Ke tša mohla a efela mosenyegi marumong, le ganong la bona, diatleng tše maatla.

16Ya ba la lehutšo la mmotlana; gwa homola wa makgopo.

17Tseba ge; yo lešego ke mosolwakeModimo; se nyatše ge kgalemo ya Yomaatlaohle;

18gobane o a gobatša, a be a tlemelele; o a hlokofatša, mme atla tšagwe di be di fodiše.

19Ge a go namoletše tlalelong tše selelago, le go tše šupago o ka se welwe ke bošula.

20Tlaleng o go efela lehu; ntweng o go efela boelo bja tšhoša.

21Mohla wa kgati tša maleme o tlo khutša; mohla go tlago tšhwalalanyo o ka se ke wa šia.

22O tlo sega tšhwalalanyo le ditlala; dibata tša naga o ka se di boife.

23O tlo ba o lakane le maswika a šokeng; le dibata tša dinaga di tlo khutšišana nago.

24Lapa la gago o tlo hwetša le na le molao, wa bona mo motseng wa gago go sa hlokwe selo.

25Bana ba gago o tlo bona e le ba bantši, le ditlogolwana di atile boka mere lefaseng.

26Lebitleng o tlo ya o tšofetše, o etša roto sa mabele lebakeng la gona.

27Sedio, re di latišitše; le wena theeletša, o be le temogo.