BAAHLODI 13 - Northern Sotho 1951/1986（NSO51）

Batswadi ba Simisone

1Baisiraele ga ba ka ba lesa go dira tše di befetšego Morena; Morena a ba gafela diatleng tša Bafilisita nywaga e masome a mane.

2Mehleng yeo go be go na le monna e mongwe wa Tsorea wa leloko la Dani; leina la gagwe e be e le Manoa; mosadi wa gagwe e be e le moopa a sa belege.

3Mosadi yo o kile a bona Morongwa wa Morena, a kwa ge a re: O be o le moopa o sa belege; bjale o tlo ithwala wa belega ngwana wa mošemanyana.

4Itote gee gore o se nwe morara le ge e le sedila, gomme o se je se e lego seila.

5Gomme o tsebe, ge o tlo ithwala wa belega ngwana wa mošemanyana, hlogo ya gagwe e se ke ya batamelwa ka legare; ka gobane lesoganyana leo, ge le sa tšo belegwa, e tlo ba mokgethwa wa Modimo; gomme ke yena e a tlogo thoma go namolela Isiraele diatleng tša Bafilisita.

6Mosadi a ya a botša monna wa gagwe a re: Go nna go be go tlile monna wa Modimo; sebopego sa gagwe e be e le sa Morongwa wa Modimo a tšhabega gagolo, ka ba ka se ke ka mmotšiša mo a tšwago; le leina la gagwe ga a ka a mpotša.

7Tše a mpoditšego tšona šedi: O itše: O tlo ithwala wa belega ngwana wa mošemanyana; bjale o se ke wa nwa morara le ge e le sedila; gobane lesogana e tlo ba mokgethwa wa Morena a sa tšo belegwa le go fihla lehung.

8Ke mo Manoa a kgopetšego Morena a re: Hle Mongaka! A monna eo wa Modimo e o mo romilego a ke a boele a tle go rena, a re rute ka mo re swanetšego go dira lesoganyana leo le tlogo belegwa.

9Gomme Modimo a kwa se Manoa a se bolelago. Morongwwa wa Modimo a boela a tla go mosadi a le mašemong, monna wa gagwe a se nae.

10Mosadi a kganyela a bitša monna wa gagwe, a re: Monna yola a bego a tlile go nna maloba, šo o bonetše.

11Manoa a tsoga, a šala mosadi nthago, a tla go monna eo, a re: A ke wena monna yola a boletšego le mosadi e? A re: Ke nna.

12Manoa a re: Bjale ge go tlo tla se o se boletšego, lesoganyana leo mekgwa ya lona e tlo ba efe le modiro wa lona?

13Morongwa wa Morena a fetola a re: Mosadi a a ile tšohle tše ke mmoditšego tšona.

14A se ke a ja tše di tšwago go morara; a se ke a nwa morara le ge e le sedila; le gona a se ke a ja seila; a hlokomele tše ke mo laetšego tšona.

15Manoa a botša Morongwa wa Morena a re: A nke re go diegiše re go hlabele putšana.

16Morongwa wa Morena a fetola a re: Le ge o ka ntiegiša, nka se ke ka ja dijo tša gago. Fela, ge o rata go tliša sehlabelo, gona se tlišetše Morena. A realo ka gobane Manoa o be a sa tsebe ge e le Morongwa wa Morena.

17A mmotšiša a re: Leina la gago o mang gore re go leboge mohla go diregago se o se boletšego.

18Morongwa wa Morena a re: O botšišetšang leina la ka, etšwe e le la matete!

19Manoa a hlaola putšanyana ya dipudi tša gagwe, le dibego tša dijo, a direla Morena sehlabelo leswikeng; gwa direga se se makatšago, Manoa le mosadi wa gagwe ba lebeletše.

20Ka gobane ge kgabo ya mollo e takumela godimo mo aletareng, Morongwa wa Morena a rotoga ka yona kgabo yeo e tšwago aletareng. Manoa le mosadi wa gagwe ba re go di bona, ba khunama ba inamela fase.

21Manoa le mosadi wa gagwe ba bona gobane Morongwa wa Morena o širogile. Ke mo Manoa le mosadi wa gagwe ba lemogilego gobane e be e le Morongwa wa Morena.

22Manoa a bolela le mosadi a re: Ruri, re tlo hwa, ka gobane re bone Modimo.

23Mosadi a fetola a re: Ge Morena a ka be a ratile go re bolaya, gona a ka be a sa ka a amogela sehlabelo le sebego diatleng tša rena; le gona a ka be a sa ka a re boneša tše ka moka a re tsebiša tše di etšago tše re di kwilego bjale.

24Gomme mosadi a ba a belega ngwana wa mošemanyana a mo rea leina la Simisone; lesoganyana la gola; Morena a mo šegofatša;

25moya wa Morena wa mo hlohleletša la mathomo ge ba le mešašeng ya Dani mo gare ga Tsorea le Esithaolo.