DIPSALME 28 - Northern Sotho 1951/1986（NSO51）

Thapelo ya go lebogaYa Dafida.

1Ke bitša wena Morena o lego lentswe la ka. Se nkhomolele, ke se tlo re ge o nkgerula ka etša ba go fologela moleteng.

2Theetša, ge ke go hlabošetša lentšu ke go llela, ke go bitša, ke emiša diatla tša ka ke lebile kua thopeng ya Ngwako o mokgethwa wago.

3O se ntlhothole le bakgopo le badiradibe, bao ba go bua tša leago, mola ba na le bobe pelong.

4Ba nee tše di lebanego ditiro tša bona le bobe bja mekgwa ya bona, le se ba se dirilego ka diatla; ba bušetše se ba swanetšego.

5Gobane ga ba hlokomele ditiro tša Morena le tše a di dirago ka diatla tšagwe. -- O tlo ba šwalalanya a se ba agiše.

6A go retwe Morena; o nkwile ge ke hlaboša lentšu la ka ke lla.

7Maatla a ka ke Morena, ke yena kotse ya ka. Pelo ya ka e botile yena, mme ka hlakodišwa, pelo ya ka ya goloka, ka mo leboga ka sefela sa ka.

8Morena ke yena maatla a batho ba gagwe, ke yena sebobophologelo sa motlotšwa wa gagwe.

9Phološa setšhaba sa gago; šegofatša mohlape wa gago, o o diše, o fele o o kuka go ya go ile.