2 SAMUELE 5 - Northern Sotho 1951/1986（NSO51）

Dafida o tšea bogoši bja Isiraele; o tšea motse wa Jerusalema; o fenya Bafilisita

1Kua motseng wa Heburone go tlile ba meloko ka moka ya Isiraele go Dafida ba re: Re batho batee le wena.

2Le maloba re sa bušwa ke Saulo, e be e le wena e o bego o etšwa le Isiraele, o re goroša. Le gona Morena o go boditše a re: Diša setšhaba sa ka sa Isiraele, o be moetapele wa sona.

3Bagolo ka moka ba Isiraele ba tla Heburone go kgoši. Kgoši Dafida a dira kgwerano le bona ba le moo pele ga Morena; ba tlotša Dafida ba mmea kgoši ya Isiraele.

4Ke ge Dafida a na le nywaga e masome a mararo, mehleng yeo ge a tšea bogoši; a buša a fetša nywaga e masome a mane.

5Nywaga e šupago le kgwedi tše di selelago ke tša ge a le Heburone. A fetša nywaga e masome a mararo le metšo e meraro a buša Juda le Isiraele ka moka a le Jerusalema.

6Kgoši le banna ba gagwe ba kile ba tšwela Jerusalema ba lwa le Bajebusi, ba ba bego ba agile nageng yeo. Bona ba be ba boditše Dafida ba re: Fa go rena o ka se ke wa tsena; le ba difofu le digole ba ka go raka! E le go re Dafida a ka se ke a ba a tsena gona.

7Fela, sebo seo sa Tsione Dafida o se tšere; ke wona motse wa Dafida.

8Mohla woo Dafida o be a boletše a re: E a ratago go fenya Bajebusi, a a tsene ka mokero wa meetse, ge a eya go bao ba digole le difofu, manaba a Dafida. Ke mo go hlagago seema sa go re: Digole le difofu ga di tsene ka ngwakong.

9Gomme Dafida a dula sebong seo, a se reela leina a re ke motse wa Dafida. Motse woo a o aga, a o agelela ka merako thoko tšohle, go tloga Milo go fihla ka gare.

10Gomme Dafida a fela a gola a eya, gobane Morena Modimo wa Mašaba o be a ema le yena.

11Gomme Hierama kgoši ya Tiro a roma batseta ba tla go Dafida, a mo romela le dikota tša morokwana, le babetli ba dikota, le babetli ba maswika; ba agela Dafida ngwako.

12Le ka tšona tšeo Dafida a lemoga gobane Morena o tiišitše bogoši bja gagwe mo go Isiraele, le gobane o phagamiša mmušo wa gagwe ka baka la Isiraele setšhaba sa gagwe.

13Gomme Dafida a fela a sa tšea basadi ba bangwe ba direthe, le basadi, a le mo Jerusalema, a khudugetše gona a etšwa Heburone; gomme a fela a sa belegelwa barwa le barwedi.

14Maina a bao ba mmelegetšwego a le Jerusalema šea: Ke Samua, le Sobala, le Nathane, le Salomo,

15le Jibehara, le Elisua, le Nefege, le Jafia,

16le Elisama, le Elyada, le Elifelete.

17Bafilisita ge ba ekwa gore Dafida o beilwe kgoši, le gore ba mo dirile kgoši ya Isiraele, ba rotoga ka moka ba mo tsoma. Dafida a re go di kwa, a fologela sebong.

18Bafilisita ba tla ba aparela moeding wa Refaima.

19Dafida a botšiša Morena a re: A ke tšwele Bafilisita? A o tlo ba gafela seatleng sa ka?

Morena a fetola a re: Tšwaa, Bafilisita ke tlo ba gafela seatleng sa gago ruri.

20Dafida a tla Baali-Peratsime, a ba fenya ntshe gomme a re: Morena o gagotše manaba a ka, bjalo ka meetse ge a šwahla. Ke ka baka leo a reetšego felo fao a re ke Baali-Peratsime.

21Bafilisita ba ba ba tlogela diswantšho tša medimo ya bona; Dafida le banna ba gagwe ba di tšea.

22Bafilisita ba boela ba tšwa, ba aparela moeding wa Refaima.

23Dafida a botšiša Morena. Morena a re: O se ke wa tšwa. Ba dike ka nthago, o ba šwahlele o etšwa ka sekgweng sa Baka.

24Ge o ekwa mešito kua dintlheng tša dihlare tša Baka, o hlaganele, gobane ke mo Morena a tlogo ba a go etile pele go fediša madira a Bafilisita.

25Dafida a dira ka mo Morena a mo laetšego ka gona, a bolaya Bafilisita go tloga gona moo Geba, a ba gomela kgauswi le Gesere.