DIPSALME 144 - Northern Sotho 1951/1986（NSO51）

Sereto sa Monamoledi le MošegofatšiSefela sa Dafida.

1A go retwe Morena, lentswe la ka. Ke yena a rutago matsogo a ka go lwa, le diatla tša ka go hlabana.

2Mogaugedi wa ka, sebo sa ka, thaba ya ka, le Mophološi wa ka, kotse ye ke e botilego, ke wena, e o mpeilego mmuši wa setšhaba sa ka.

3Morena, motho ke selo mang ge o bile o mo tseba? Le ngwana wa motho ke eng, ge o mo hlokomela?

4Motho o swana le muši; bophelo bja gagwe ke thiti e fetago.

5Morena, sekamiša legodimo lago o fologe, kgwatha dithaba di tupe meuši.

6Gadimiša dikgadima o ba phatlalatše. Betša mesebe ya gago o ba fediše.

7Ntšha diatla tša gago o le moo tletlolo, o nkinole madibeng magolo, diatleng tša ba mohuta o šele,

8Ba melomo ya go bata maaka, bao letsogo la bona letona e lego la go ena bofora.

9Modimo, a nke ke go hlabele sefela se sefsa, ke go binele ka lekope le ka metato e lesome.

10Ke wena o fago dikgoši go fenya, o efelago Dafida mohlanka wa gago lerumo le lebe.

11Nkefele o mphološe diatleng tša batho ba mathoko, ba melomo ya go bata maaka, bao letsogo la bona le letona e lego la bofora.

12Ke mo bana ba rena ba tlogo etša mere ya go hlekwa ge e mela, mme barwedi ba rena ba tlo etša dikokwane tše di setilwego tša go thekga nywako ya bogoši.

13Nywako ya rena ya matlolo e tlo tlala ya ntšhiwa tša mehutahuta; diruiwa tša rena di tlo tswala ka diketekete, kgoloborethe mafulong a rena!

14Dipholo tša rena di rwale, go se na go thubja le go thopša, le ge e le mokgoši mebileng ya rena.

15Ke ona mahlatse a setšhaba, mahlatse a setšhaba seo Morena e lego Modimo wa sona.