1Ka buša ka bona mehlako ka moka e hlakišago batho fa tlase ga letšatši. Ka bona megokgo ya bahlaki, ba se ne mohomotši. Ka bona bahlakiši ba bona ba na le maatla, bona ba se ne mohomotši.
2Ka na ka reta ba hwilego kgale, ka re ke bona ba lehlogonolo, ba feta ba ba phelago.
3Ka re e a ba fetago bohle ka babedi, ke yoo a sešogo a ba gona, e a sa bonego mediro e mebe ye e dirwago fa tlase ga letšatši.
4Ka bona mediro ka moka, le matšo a mediro yohle, e le tša ge motho a tsebafela wabo, e le tša lefela, e le go phuthela moya ka kobo.
5Setlatlahunyetšamatsogo se ja nama ya mmele wa sona.
6Seatlatabolakhutšo se phala matsogo-mašubuka-ditapišo le go phuthela moya ka kobo.
7Ka buša ka bona lefela fa tlase ga letšatši.
8Ka bona e mongwe a dutše a nnoši, a se ne yo mongwe, a se ne ngwana le wabo; mme ditapišo tšagwe di sa fele, mahlo a gagwe a sa hore mahumo, a se re: Ke itapišetša mang ge ke ikona tše botse? -- Le gona ke lefela, ke go itlhakiša o mobe.
9Bolo ke mola e le ba babedi, e sego o tee; ke bona ba tlogo boelwa ke tše botse ka boitapišo.
10Ge ba ka wa ba tlo tsošana. Yo madimabe ke mowaannoši a hloka motsoši.
11Le gona ba le dilaong e le ba ba bedi ke go kwešana borutho; e a robalago a le noši a ka ruthela bjang?
12O tee a ka fenywa; ba babedi ba tlo emelana; lenti la melogo e meraro ga le fo kgaoga.
13Sogana la mmotlana le bohlale, le phala kgoši ge e tšofetše ya šilofala mme ya gana go eletšwa.
14Le tšea bogoši le etšwa kgolegong; gobane e le modiidi le tswaletšwe bogoši bja lona.
15Ka bona bohle ba phelago fa tlase ga letšatši, ba latela lesogana la go hlatlama yola.
16Go be go se mo bontši bja setšhaba bo felago, bontši bja ba bego ba mo loba. Fela, ba la ka moswana ba se mo thabele; ka gobane le tšona tše ke lefela, ke go phuthela moya ka kobo.
17Lotola leoto la gago ge o ya Ngwakong wa Modimo; gobane ge o batamela gore o theetše, go phala mola mašilo a tliša didimo, ba sa itemoge dibe tše ba di dirago.
Who We AreWhat We EelieveWhat We Do
2025 by iamachristian.org,Inc All rights reserved.
