1A bolela ka seswantšho sa go re motho a fele a rapela a sa lape, a re:
2Go kile gwa ba le moahlodi e mongwe e a sa boifego Modimo, a sa šie motho.
3Mme motseng woo go be go na le mosadi wa mohlologadi; yena a fela a tla go moahlodi eo, a re: Nnamolele go e a ntshekišago.
4Moahlodi eo a gana gantši; a ba a eleletša a re: Le ge ke sa boife Modimo, le motho ke sa mo šie,
5Ke tlo mo namolela, ka gobane mohlologadi yo o a ntapiša; gore e se be ge a fela a etla ka mehla le mehla, a tlo ba a nngamola hlogo.
6Morena a re: Kwang se moahlodi e a sa lokago a se bolelago.
7Bjale Modimo, a a ka se namolele bakgethwa ba gagwe ba ba mmitšago mosegare le bošego, le ge a ka ba letetša?
8Ke a le botša, o tlo ba namolela ka bjako. Fela, Morwamotho mohla a tlago a le re o tlo hwetša lefaseng go sa na le tumelo?
9A buša a bolela le ba ba ipotilego ba re re lokile, mme ba nyatša ba bangwe; a ba botša seswantšho a re:
10Ntlongkgethwa go kile gwa tla batho ba babedi ba rapela. E mongwe e be e le mofarisei, e mongwe e be e le wa lekgetho.
11Mofarisei a ema a ithapelela a re: Modimo, ke a go leboga gobane ga ke swane le batho ba bangwe ba bahlakodi, le ba ba sa lokago, le ba diotswa, le ge e le wa lekgetho yo.
12Ke ikona gabedi ka beke e nngwe le e nngwe; go tšohle tše ke di ruago ke ntšha sa lesome.
13Wa lekgetho a ema kgole, a šia le go lelalela legodimong; a itshetla sehuba a re: Modimo, nkgaugele, nna modiradibe.
14Ke a le botša, yena yo o boetše ngwakong wa gagwe a lokafetše, e sego yola; gobane e a ikgodišago o tlo kokobetšwa; mme e a ikokobetšago o tlo godišwa.
15Ba tliša bana go Jesu, gore a ba sware; mme barutiwa ge ba di bona, ba ba kgalema.
16Jesu a ba bitša, a re: Lesang bana ba tle go nna; le se ke la ba thibela, gobane mmušo wa Modimo ke wa ba bjalo.
17Ruri, ke a le botša, e a sa amogelego mmušo wa Modimo bjalo ka ngwana, a ka se ke a tsena go wona.
18Gwa tla e mongwe wa ba bagolo a mmotšiša a re: Moruti yo botse, ke tlo dirang gore ke rue bophelo bjo bo sa felego?
19Jesu a re: O reng o ntha yo botse? Ga go yo botse ge e se Modimo.
20Melao o a e tseba, e rego: O se ke wa otswa; o se ke wa bolaya; o se ke wa utswa; o se ke wa bolela bohlatse bja maaka: godiša tatago le mmago.
21Monna eo a re: Tšeo ka moka ke di lotile go tloga bjaneng bja ka.
22Jesu ge a mo kwa a realo a re: O sa hlaelelwa ke se tee. Ka moka tše o nago le tšona di rekiše o abele bahloki; ke mo o tlogo ba le lehumo legodimong; mme o tle o ntatele.
23Monna eo ge a ekwa Jesu a realo a nyama; ka gobane o be a ruile ka kudu.
24Jesu ge a mmona a nyamile, a re: Go tsena mmušong wa Modimo go thatafalela mohumi.
25Gobane, mohumi go tsena mmušong wa Modimo, -- go kaone ge kgomo e ka re e tsena ka lešobana la tšhwana.
26Ba ba mo kwilego ge a realo, ba re: Gomme go ka phologa mang?
27Jesu a re: Tše di sa kgonegego go batho, di kgonega go Modimo.
28Petro a re: O ko bone; rena re tlogetše tšohle ra go latela.
29Jesu a fetola a re: Ruri, ke a le botša, ga go e a tlogetšego lapa le batswadi, le bana babo le mosadi, le ge e le bana, ka baka la mmušo wa Modimo.
30E a sa boelwego ke tše ntši-ntši e sa le mehleng yeno; mme mehleng e tlogo tla o tlo bona bophelo bjo bo sa felego.
31A tloga le ba lesome le metšo e mebedi, a bolela le bona a re: Bonang! Re rotogela Jerusalema. Go yo phethega tšohle tše di ngwadilwego ke baporofeta ba era Morwamotho.
32Gobane o tlo gafelwa bantle, a kwerwa, a tlaiswa, a tshwelwa ka mare.
33Ya tlo re ge ba mo otlile ba tlo mmolaya; mme ka tšatši la boraro o tlo tsoga.
34Fela, ba se kwešiši selo; polelo yeo ya dula e ba širetše, ba sa lemoge tše ba di boditšwego.
35Ge a batamela motse wa Jeriko, gwa ba go ne motho wa sefofu, a dutše hleng ga tsela a kgopela.
36Ge a ekwa lešaba la batho le feta, a botšiša a re: Ke eng go?
37Ba mmotša ba re: Ke Jesu wa Natsaretha. O a feta.
38Ya ba gona a goeletšago a re: Jesu Morwa Dafida! Nkgaugele!
39Ba ba etilego pele ba mo kgalema ba re a homole. Ya ba gona a hlabošago lentšu ka go fetiša, a re: Morwa Dafida! Nkgaugele!
40Jesu a ema, a re ba mo tliše go yena. Ge a batametše a mmotšiša a re:
41O rata ge nka go dirang?
A re: Morena, a nke ke boele ke bone.
42Jesu a re: Boela o bone! Tumelo ya gago e go phološitše.
43A napa a bona e sa le semeetseng, a mo latela a fela a godiša Modimo, le batho ka moka ba ba di bonego ba reta Modimo.
Who We AreWhat We EelieveWhat We Do
2025 by iamachristian.org,Inc All rights reserved.
